ޑެޕިއުޓީ ގަވަރުނަރު ވަކިކުރާން މަޖިލީހަށް ހުށަހަޅައިފި

ޑެޕިއުޓީ ގަވަރުނަރު އަހުމަދު އިމާދު — މިހާރު ފޮޓޯ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޑެޕިއުޓީ ގަވަރުނަރު އަހުމަދު އިމާދު އެ މަގާމުން ވަކިކުރާން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް މިއަދު ހުށަހަޅައިފި އެވެ.

ޑެޕިއުޓީ ގަވަރުނަރު ކަމުން އިމާދު ވަކި ކުރާން ރައީސުލްޖުމްހޫރިއްޔާއަށް ލަފާ އަރުވާން ކޮމިޓީއަށް މިއަދު ހުށަހެޅުއްވީ ދިއްދޫ ދާއިރާގެ މެންބަރު އަބްދުއްލަތީފް މުޙައްމަދެވެ.

އެ މައްސަލައިގައި ފާހަގަ ކޮށްފައި ވަނީ އެމްއެމްއޭގެ ގަވަރުނަރު ކަމުގައި ކުރީގެ ގަވަރުނަރު އަލީ ހާޝިމް ހުރިއިރު، ގާނޫނުގައި ބަޔާން ކޮށްފައިވާ މަގުސަދުތައް ހާސިލު ކުރެވިފައި ނުމުވުމާއި އެމްއެމްއޭގެ މައިގައިނޑު އަސާސް ކަމުގައިވާ މަނިޓަރީ ޕޮލިސީ އެންމެ އަކަށީގެން ގޮތަށް ހިނގައި ދިޔަތަން ފެނިފައިނުވާ ކަމަށެވެ. އޭގެ އިތުރުން ގާނޫނުން އިމާދުގެ މައްޗަށް މަތިކޮށްފައިވާ ޒިންމާތައް އަދާ ކުރުމަށް އޭނާ ފަސްޖެހިފައިވާ ކަމަށް ވެސް މައްސަލައިގައި ފާހަގަކޮށްފައިވެ އެވެ.

އެމްޑީޕީގެ ދެ މެންބަރުން ކަމުގައިވާ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު އާއި ހަނިމާދޫ ދާއިރާގެ މެންބަރު އަބްދުލްގަފޫރު މޫސާ، އެ ހުށަހެޅުމަށް ތާއީދެއް ނުކުރައްވަ އެވެ.

އެ ދެ ބޭފުޅުން ފިޔަވައި ދެން ތިއްބެވި ހުރިހާ މެންބަރުންގެ ވޯޓާ އެކު އެ މައްސަލަ ވަނީ މަޖިލީހުގެ ތަޅުމަށް ހުށަހަޅާން ފާސް ކޮށްފައެވެ. އެ މައްސަލަ ކޮމިޓީން ކުރިއަށް ގެންދެވޭނީ މަޖިލީހުގެ ތަޅުމުން ފާސް ކޮށްގެންނެވެ.

މަޖިލިސް