ފުލެޓު ލިސްޓަށް ޝަކުވާ ހުށަހަޅަން ކައުންސިލުން އެހީތެރިކަން ދެނީ

މާލޭ ސިޓީ ކައުންސިލްގެ ބައްދަލުވުމެއްގެ ތެރެއިން -- ފޮޓޯ/ ސިޓީ ކައުންސިލް

"ގެދޮރުވެރިޔާ" ސްކީމުގެ ދަށުން ދޫކުރާ ފުލެޓުތަކާ ގުޅުވައިގެން ޝަކުވާ ހުށަހެޅުމަށް ފަސޭހަކޮށްދިނުމުގެ ގޮތުން އެކަމަށް ބޭނުންވާނޭ އެހީތެރިކަން ފޯރުކޮށްދިނުމަށް މާލޭ ސިޓީ ކައުންސިލުން ނިންމައިފި އެވެ.

ސިޓީ ކައުންސިލުން މިއަދު ނެރުނު ދެންނެވުމުގައި ބުނީ ގެދޮރުވެރިޔާ ސްކީމްގެ ދަށުން ޝަކުވާ ހުށަހެޅުމަށް ބޭނުންވާ ފަރާތް ތަކަށް އެހީތެރިކަން ފޯރުކޮށް ދިނުމަށް ޓަކައި އެ އިދާރާގެ އާއްމު ހިދުމަތްތަކާބެހޭ ބައިގައި މިއަދުން ފަށައިގެން މި މަހުގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހަކު އެ އިންތިޒާމު ހަމަޖައްސާފައި ވާނެ ކަމަށެވެ.

އެ ގޮތުން ހިދުމަތް ދޭ ގަޑި ތަކަކީ ހެނދުނު 10:00 ން 2:30 އަށް އަދި ރޭގަނޑު 9:30 އިން 11 އަށެވެ.

މިދިޔަ ސަރުކާރުން ކުރިއަށް ގެންދިޔަ "ގެދޮރުވެރިޔާ" ސްކީމްގެ ދަށުން އިމާރާތް ކުރި 4،000 ފުލެޓުގެ ތެރެއިން ޝަރުތުހަމަވެ، ފުލެޓު ލިބުނީ 1،820 މީހުންނަށެވެ.

އޭގެ ތެރޭގައި ހިމެނެނީ ތިން ކޮޓަރީގެ ލިސްޓުގައި ހިމެނޭ 3721 މީހުންގެ ތެރެއިން ޝަރުތު ހަމަވެ، 75 ޕޮއިންޓު ލިބިފައިވާ 1،423 މީހުންނާއި ދެ ކޮޓަރީގެ ލިސްޓުގައިވާ 1،218 މީހުންގެ ތެރެއިން ޝަރުތުހަމަވެ، 73 ޕޮއިންޓުލިބުނު 397 މީހުންނެވެ.

ފުލެޓު ލިސްޓަށް ޝަކުވާ ހުށަހެޅުމުގެ ފުރުސަތު މި މަހުގެ ނިޔަލަށް ވަނީ ހުޅުވާލާފަ އެވެ.

މާލެ ސިޓީ ކައުންސިލް