ކުރިއަށް އޮތް ދެ ދުވަހުވެސް ރާއްޖޭގެ ބޮޑު ބަޔަކަށް ވިއްސާރަ ކުރާނެ: މެޓް

ކުރިއަށް އޮތް ދެ ދުވަހުވެސް ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް މެޓުން ލަފާ ކުރޭ

ކުރިއަށް އޮތް ދެ ދުވަހު ވެސް ރާއްޖެއަށް ވިއްސާރަ ކުރާނެ ކަމަށް ލަފާކުރެވޭ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް) އޮފީހުން ބުނެފި އެވެ.

އެ އިދާރާއިން ބުނީ ރާއްޖޭގެ އިރުމަތީގައި އުފެދިފައިވާ ކޮޅިގަނޑު މަޑުމަޑުން ހުޅަނގަށް ޖެހޭނެ ކަމަށް ލަފާ ކުރެވޭ ކަމަށާއި އެހެން ކަމުން މިމަހުގެ 11 އަދި 12 ވަނަ ދުވަހު ރާއްޖޭގެ އެކި ހިސާބަށް ވިއްސާރަ ކުރާނެ ކަމަށެވެ.

މެޓުގެ އޮފިޝަލަކު ވިދާޅުވި ގޮތުގައި މި ދެ ދުވަހު ކުރާ ވިއްސާރާގައި ރާއްޖޭގެ އެއްވެސް ރަށަކަށް އުދައިގެ އަސަރެއް ނުކުރާނެ އެވެ.

ކަނޑުތައް އުޅޭނީ މެދުރާއްޖެތެރެއާއި އުތުރުގައި އާދައިގެ ވަރަކަށް ގަދަކޮށް ކަމަށާއި ނަމަވެސް ދެކުނަށް އާދައިގެ ވަރަކަށް މަޑުވާނެ ކަމަށެވެ. އަދި މެދުތެރޭގެ އަތޮޅުތަކަށް އާންމު ގޮތެއްގައި 10 މޭލާއި 20 މޭލާ ދެމެދުގެ ބާރު މިނުގައި ވައި ޖެހޭއިރު ދެކުނަށް ވައި އުޅޭނީ ގަޑިއަކު ފަސް މޭލާއި 15 އާ ދޭތެރޭގައި ކަމަށެވެ.

މެޓުން ވަނީ މި ދެ ދުވަހު އުތުރާއި މެދުރާއްޖެތެރޭގެ ބައެއް ރަށްތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާ ކުރެވޭތީ އާންމުކޮށް ހުރިހާ ފަރާތްތަކުން، މޫސުމަށް ސަމާލު ވުމަށް އިސްތިމާސް ކޮށްފަ އެވެ.

މެޓް އޮފީސް