އިސްރާއީލުން ޣައްޒާގައި ހިންގަމުން ގެންދާ ލާއިންސާނީ ޢަމަލުތަކާ ގުޅިގެން ކޮލަމްބިއާ އިން އިސްރާއީލަށް ބޯޓްދެލި އެކްސްޕޯޓްކުރުން ހުއްޓާލައިފިއެވެ.

ފަލަސްތީނުގެ ނޫސް އެޖެންސީ (ވަފާ) އިން ރިޕޯޓްކޮށްފައިވާ ގޮތުގައި، ކޮލަމްބިއާގެ ރައީސް އެކްސްގައި ކުރެއްވި މެސެޖެއްގައި ވިދާޅުވީ "ޣައްޒާގައި އިސްރާއީލުން ހިންގާ ގަތުލުއާންމު ނިމެންދެން ކޮލަމްބިއާ އިން އިސްރާއީލަށް ބޯޓްދެލި އެކްސްޕޯޓްކުރުން ހުއްޓާލާނަން" ކަމަށެވެ.

ޣައްޒާއަށް އިސްރާއީލުން ދެމުންދާ ޙަމަލާތަކުގެ ސަބަބުން އިސްރާއީލާ ދެކޮޅަށް ޑިޕްލޮމެޓިކް ފިޔަވަޅުތައް އަޅަމުންދާ ޤައުމުތަކުގެ ލިސްޓުގައި ވެސް ކޮލަމްބިއާ ހިމެނެއެވެ.

މިދިޔަ މެއި މަހު ކޮލަމްބިއާގެ ރައީސް ވަނީ އިޒްރޭލާ އެކު ސިޔާސީ ގުޅުން ކަނޑާލިކަން އިއުލާނުކޮށްފައެވެ. އަދި އިސްރާއީލުގެ ރައީސް ނަތަންޔާހޫ އާއި އޭނާގެ ބޮޑުވަޒީރު ފަލަސްތީނުގައި އިސްރާއީލުގެ ސިފައިން ހިންގާ ގަތުލުއާންމަށް ޒިންމާވާން ޖެހޭނެކަމަށް ވެސް ވަނީ ކޮލަމްބިއާއިން ބުނެފައެވެ.

ނަތަންޔާހޫއަކީ ޣައްޒާގައި "ޖަރީމާ ހިންގާ" ބޭފުޅެއްގެ ގޮތުގައި ސިފަކުރައްވައި ކޮލަމްބިއާގެ ރައީސް ޕެޓްރޯ ވަނީ ނަތަންޔާހޫއަށް ވަރަށް ބޮޑަށް ފާޑުވިދާޅުވެފައެވެ.

ކޮލަމްބިއާގެ ރައީސް ވަނީ އިޒްރޭލުން ފަލަސްތީނުގައި ހަނގުރާމާގެ ޖަރީމާ ހިންގަމުންދާ ކަމަށް ބުނެ ބައިނަލްއަގުވާމީ ކޯޓް އޮފް ޖަސްޓިސްގައި ދެކުނު އެފްރިކާއިން ހުށަހެޅި މައްސަލާގައި އޭނާގެ ގައުމުން ތަދައްޚުލްވާން ބޭނުންވާ ކަމަށް ބުނެފައެވެ.