ހޯމަ ދުވަހުން ފަށައިގެން މަސްދަޅު ކޭސް ދޫކުރާނީ މިފްކޯގެ ފިހާރަތަކުން

ރޯދަ ހަދިޔާގެ ގޮތުގައި ސަރުކާރުން ދޭ މަސްދަޅު ކޭސް ދޫކުރުން -- މިހާރު ފޮޓޯ

ސަރުކާރުން މި ރަމަޟާންމަހު ރޯދަ ހަދިޔާގެ ގޮތުގައި ދެމުން އަންނަ މަސްދަޅު ކޭސް އަންނަ ހޯމަ ދުވަހުން ފަށައިގެން ދޫ ކުރާނީ ހަމައެކަނި މިފްކޯގެ ފިހާރަ ތަކުން ކަމަށް ލޯކަލް ގަވަނެންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

އާދަމް ޝަރީފު މިރޭ ކުރެއްވި އެކްސް ޕޯސްޓެއްގައި ވިދާޅުވީ، މިހާތަނަށް އައިއިރު، މާލެ ސަރަހައްދުގައި 48 ހާސް ގޭބިސީއަށް ރޯދަ ހަދިޔާ ދޫކޮށްފައިވާ ކަމަށެވެ. އަދި މިރެއާ އެއްގޮތަށް މާދަމާރޭ ވެސް 13 މަރުކަޒުން ރޯދަ ހަދިޔާ ދޫކުރާނެ ކަމަށެވެ.

މިނިސްޓަރު ވިދާޅުވީ ގިނަ ފަރާތް ތަކަކަށް ރޯދަ ހަދިޔާ ދޫކުރެވިފައިވުމާއެކު، ދެން ރޯދަ ހަދިޔާ ދޫ ކުރާނީ މިފްކޯގެ ފިހާރަ ތަކުން ކަމަށާއި އެގޮތުން މާލެ އަދި ހުޅުމާލޭގައި ހުރި މިފްކޯގެ ހަތަރު ފިހާރަ ހުޅުވާފައި ހުންނަ ވަގުތު ތަކުގައި މަސްދަޅު ކޭސް ދޫކުރުން ކުރިޔަށް ގެންދާނެ ކަމަށެވެ.

މި ބަދަލު ގެނައި ނަމަވެސް މިފްކޯގެ ފިހާރަ ތަކުން މަސްދަޅު ކޭސް ދޫކުރުން ކުރިއަށް ގެންދާނީ މިހާރެކޭ އެއްގޮތަށް، އޮންލައިން ޓޯކަން ނިޒާމުގެ ތެރެއިން ކަމަށް ވެސް އާދަމް ޝަރީފު ވިދާޅުވި އެވެ.

މި ރޯދަމަހަށް ސަރުކާރުން ދޭ ހަދިޔާއެއްގެ ގޮތުގައި ކޮންމެ ގޭބިސީއަކަށް ދޭނީ 180 ގުރާމުގެ 48 ދަޅުގެ ކޭހެކެވެ.

ސަރުކާރުން ކުރިން ބުނެފައި ވަނީ ގާތްގަނޑަކަށް ރާއްޖޭގެ 80،000 އަށް ވުރެ ގިނަ ގޭބިސީ ތަކަށް މަސްދަޅު ކޭސް ބަހާނެ ކަމަށެވެ.

އާދަމް ޝަރީފް އުމަރު