ޑރ. އިރުތިޝާމް، ސަފީރުކަމުގެ ފަތްކޮޅު ފްރާންސުގެ ރައީސަށް އަރުވައިފި

--ޑރ. އިރުތިޝާމްގެ ސަފީރު ކަމުގެ ފަތްކޮޅު ވަނީ މިއަދު ފްރާންސުގެ ރައީސަށް އަރުވާފައި

ދިވެހިރާއްޖެއިން ފްރާންސަށް ކަނޑައަޅާފައިވާ ނޮން ރެސިޑެންޓް ސަފީރު، ޑރ. އިރުތިޝާމް އާދަމް، އެ ކަމަނާގެ ސަފީރު ކަމުގެ ފަތްކޮޅު ފަރަންސޭސި ވިލާތުގެ ރައީސް އިމަނުއެލް މެކްރޯން އަށް އަރުވައިފި އެވެ.

އިރުތިޝާމަކީ އިނގިރޭސި ވިލާތަށް ރާއްޖެއިން ކަނޑަޅާފައި ހުންނަވާ ސަފީރުވެސްމެ އެވެ.

ފަތްކޮޅު އެރުވުމުގެ ރަސްމިއްޔާތު އޮތީ ފްރާންސުގެ ރިޔާސީ ގަނޑުވަރުގަ އެވެ.

މި ރަސްމިއްޔާތަށްފަހު ބޭއްވި ބައްދަލު ކުރެއްވުމުގައި، ސަފީރު އިރުތިޝާމް އާދަމް ވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ފަރާތްޕުޅުންނާއި ދިވެހި ސަރުކާރާ އެންމެހައި ރައްޔިތުންގެ ފަރާތުން ރައީސް މެކްރޯންއަށާއި، ފްރާންސްގެ ސަރުކާރާއި ރައްޔިތުންނަށް ތަހުނިޔާ އާއި ހެޔޮ އެދުންތައް ދަންނަވާފަ އެވެ.

ފޮރިން މިނިސްޓްރީން ބުނީ މި ބައްދަލުކުރެއްވުމުގައި ދެ ގައުމުގެ ދެމެދު އޮތް ދުވަސްވީ ގުޅުން އިތުރަށް ހަރުދަނާ ކުރުމަށާއި، ވިޔަފާރިއާއި، އިންވެސްޓްމަންޓު އިތުރު ކުރުމަށް ފްރާންސްގެ ސަރުކާރާއެކު މަޝްވަރާ ކުރެއްވި ކަމަށެވެ.

އިރުތިޝާމްގެ އަރިހުގައި ތާޑް ސެކްރެޓަރީ އާމިނަތު ސަމްރާ ބައިވެރިވެވަޑައިގެންނެވި އެވެ.

ފޮރިން މިނިސްޓްރީ