އެޗްޑީސީއާއި ސަލަފު ގުޅިގެން ހުޅުމާޅެ ހޮސްޕިޓަލަށް އިފްތާރު ޕެކް ފޯރުކޮށްދެނީ

އެޗްޑީސީ އާއި ސަލަފު ޖަމުއިއްޔާ ގުޅިގެން، ހުޅުމާލޭ ހޮސްޕިޓަލަށް އިފްތާރު ޕެކް ފޯރުކޮށްދިނުމާ ގުޅޭ އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގެ ދަށުން ރޯދަ މަހުގައި ފޯރުކޮށްދޭ އިފްތާރު ޕެކްތައް ތައްޔާރު ކުރުމަށް އެޗްޑީސީން ވަނީ ސަލަފު ޖަމުއިއްޔާއަށް ބޭނުންވާ ވޯކިން ސްޕޭސް ހަމަޖައްސައިދީފަ އެވެ.

އެގޮތުން، ރޯދަ މަހުގެ ކޮންމެ ދުވަހެއްގައި ހުޅުމާލޭ ހޮސްޕިޓަލްގައި މަސައްކަތް ކުރާ ސިއްހީ ދާއިރާގެ މުވައްޒަފުންނާއި ހޮސްޕިޓްލުގައި ފަރުވާ ހޯދަމުން އަންނަ ބަލި މީހުންނަށް އެ ޕްރޮގުރާމްގެ ދަށުން އިފްތާރު ޕެކް ފޯރުކޮށްދޭނެ އެވެ.

މި ޕްރޮގްރާމްގެ ކޯޑިނޭޓަރު މުޙައްމަދު ޝުޖާއު ވިދާޅުވީ ހިލޭ ސާބަހަށް ކުރާ އެފަދަ ކަންކަމަށް ވެސް ބޮޑު ކުލީގައި ތަނެއްހިފައިގެން މަސައްކަތް ކުރުމަކީ ވަރަށް ބޮޑު ދަތިކަމެއް ކަމަށާއި އެހެންކަމުން މިފަދަ ތަނެއް ހަމަޖެހުމަކީ މި މަސައްކަތަށް ލިބުނު ބޮޑު ފަސޭހައެއް ކަމަށެވެ.

ނަމަވެސް މިއަހަރު މިފަދައިން އެޗްޑީސީން ހަމަޖައްސަވައި ދެއްވިކަމީ އަޅުގަނޑުމެން ވަރަށް ޝުކުރުވެރިކަމާއެކު ފާހަގަކުރާކަމެއް،" ސުޖާއު ވިދާޅުވި އެވެ.

މި ޕްރޮގްރާމުގެ މައިގަނޑު ބޭނުމަކީ ބަރަކާތްތެރި ރޯދަ މަހުގައި އެކަކު އަނެކަކަށް އެހީތެރިވެ އަޅާލުމަށާއި، އިސްލާމީ ރިވެތި އާދަތަކާ އެއްގޮތަށް އެކަކު އަނެކަކަށް ހަދިޔާ ދިނުމަށް ޓކައި ކުރިއަށް ގެންދާ ޕްރޮގްރާމެކެވެ. މީގެ އިތުރުން ބަލި މީހުންނަށް ފަރުވާ ދިނުމަށް، ވަރުބަލިކަމެއްނެތި ސިއްހީ ދާއިރާގެ މަސައްކަތްތެރީން ކުރާ ބުރަ މަސައްކަތުގެ އަގު ވަޒަން ކުރުމުގެ ގޮތުން ކުރިއަށްގެންދާ ހަރަކާތެއްވެސް މެއެވެ.

އެޗްޑީސީ އިން ބުނީ އެ ކުންފުނީގެ އަމާޒަކީ، ކުންފުނީގެ ސީއެސްއާރުގެ ދަށުން ކުރިއަށް އޮތް ތަނުގައި ވެސް މިފަދަ މުޖުތަމައުއަށް ފައިދާ ހުރި ގިނަ ޕްރޮގުރާމް ތަކެއް ހިންގުމާއެކު ރޯދަ މަހުގައި އެކަކު އަނެކަކަށް އެހީތެރިވުމަށް ބާރު އެޅުން ކަމަށެވެ.