އައިޖީއެމްއެޗުގެ ހިދުމަތްތައް ހަރުދަނާ ކުރާން މަޝްވަރާ ކޮށްފި

އައިޖީއެމްގެ ހިދުމަތްތައް ހަރުދަނާ ކުރުމަށް މިވަނީ މަޝްވަރާކޮށްފައި --

އިންދިރާގާނދީ މެމޯރިއަލް ހޮސްޕިޓަލް، އައިޖީއެމްއެޗް އިން ދެމުންގެންދާ ހިދުމަތްތައް ހަރުދާނާ ކުރުމާއި ގުޅޭގޮތުން ހެލްތު މިނިސްޓަރު އަބުދުﷲ ނާޒިމް އިބްރާހިމް އެ ހޮސްޕިޓަލްގެ އިސްވެރިންނާ މިއަދު ބައްދަލު ކުރައްވައިފި އެވެ.

ހެލްތު މިނިސްޓްރީން ބުނީ މިބައްދަލުމުގައި މިނިސްޓަރު ނާޒިމް ދެއްކެވި ވާހަކަފުޅުގައި އައިޖީއެމްއެޗަށް ޑޮކްޓަރަށް ދެއްކުމަށް އޮންނަ ކިއު ކުޑަ ކުރުމާއި، އައިޖީއެމްއެޗްގެ ސްޕެޝެލިސްޓުން މެދުވެރިކޮށް އަތޮޅު ތެރޭގައި ކުރިއަށްދާ އައުޓްރީޗް ޕްރޮގްރާމްތައް މިހާރަށްވުރެ ފުޅާކޮށް ގެންދިއުމަށް އިރުޝާދު ދެއްވި ކަމަށެވެ.

އަދި އައިޖީއެމްއެޗުން ފޯރުކޮށްދޭ ހިދުމަތްތަކާއި އެ ހިދުމަތްތަކާއި ގުޅޭ މައުލޫމާތު ވީހާވެސް ސާފުކޮށް، ރައްޔިތުން އިހުތިރާމް ކުރާ އަދި ބަލައިގަންނަ ތަނަކަށް އެ ހޮސްޕިޓަލް ހެދުމަށް ޓަކައި ކަސްޓަމާ ކެއާގެ ހިދުމަތް މިހާރަށް ވުރެ ރަނގަޅު ކުރުމަށް ވެސް މަޝްވަރާކުރި ކަމަށް މިނިސްޓްރީން ބުންޏެވެ.

މީގެއިތުރުން މި ބައްދަލުވުމަށްފަހު މިނިސްޓަރު ވަނީ އައިޖީއެމްއެޗްގައި އެނދުގެ އަދަދު ނުވަތަ ބެޑް ކެޕޭސިޓީ އިތުރު ކުރުމަށް ފަށާފައިވާ ޕްރޮޖެކްޓްގެ މަސައްކަތް ހިނގަމުންދާގޮތް ބައްލަވާލައްވާފަ އެވެ.

ރާއްޖޭގެ މައި ހޮސްޕިޓަލް އައިޖީއެމް ހޮސްޕިޓަލަށް އޮތް ޑިމާންޑާ އެއްވަރަށް ހިދުމަތް ފުޅާކޮށް، އެޑްމިޓްކޮށް, ހިދުމަތްދޭ ފަރާތް ތަކަށް މިހާރު ދޭ ހިދުމަތް ހަރުދާނާ ކުރުމަށް ޓަކައި 75 އެނދު އިތުރު ކުރުމަށް ވަކި އޭރިއާއެއް އެ ހޮސްޕިޓަލުގައި ދަނީ ތަރައްގީ ކުރަމުންނެވެ.

އައިޖީއެމްއެޗް