ހުޅުމާލޭގައި ބިނާކުރާ މިސްކިތެއްގެ ބިންގާ ރައީސް އަޅުއްވައިދެއްވައިފި

އަމިއްލަ ފަރާތެއްގެ އެހީގައި ހުޅުމާލޭގައި ބިނާ ކުރާ މަސްޖިދު މަސްޖިދު އުންމުލްމުއުމީން އައިޝާ ރަޟިﷲ އަންހާގެ ބިންގާ، ރައީސުލްޖުމުހޫރިއްޔާ ޑރ. މުޙައްމަދު މުއިއްޒު އަޅުއްވައި ދެއްވައިފި އެވެ.

މިކަމަށް ޓަކައި މިއަދު މެންދުރު ހުޅުމާލޭގައި ވަނީ ހާއްސަ ރަސްމިއްޔާތެއް ބާއްވާފަ އެވެ.

މަދީނާ އިންވެސްޓްމެންޓުގެ ފަރާތުން މެނޭޖު ކުރުމަށް ހަމަޖެހިފައިވާ މި މިސްކިތް އަޅަނީ ހުޅުމާލެ ފޭސް އެކެއްގެ ރެޑްވޭވް ކައިރީގައި ހަދާފައިވާ ވަގުތީ މިސްކިތްހުރި ބިމުގައެވެ.

މި މިސްކިތަކީ އިސްލާމީ ދިރާސާ ކުރާން ބޭނުންވާ ފަރާތް ތަކާއި ކިޔަވާ ކުދީންނަށް، ނަމާދުގެ ފަހުން ކިޔަވަން ރިސާޗް ހެދުމަށާއި، އެސައިންމަންޓް ހެދުމަށާއި ފޮތްކިޔަން ތިބެވޭ ގޮތަށް ފުރިހަމަ ލައިބްރަރީއަކާ އެކު 2 ބުރިއަށް ބިނާ ކުރެވޭ މިސްކިތެކެވެ.

ކީރިތި ރަސޫލާގެ އަނބިކަނބަލުން އުންމުލްމުއުމިނީން އައިޝަތުގެފާނަށް ނިސްބަތް ކުރެވިފައިވާ މި މިސްކިތުގައި އެތެރެ އާއި ބޭރާއެކު 2،000 މީހުންނަށް ނަމާދު ކުރެވޭނެ އެވެ.

މި މިސްކިތުގެ މަސައްކަތް ނިމޭއިރު ފުރިހަމަ ސޯލާ ނިޒާމަކުން ކަރަންޓުދެވި މިސްކިތް އޭސީ ކުރުމަށް ހަމަޖެހިފައިވާއިރު މިސްކިތުގައި އަންހެނުންނަށް ވެސް ނަމާދު ކުރެވޭ ޖާގައާއެކު ހާއްސަ ފާހަނާ ވެސް ހުންނާނެއެވެ.

މީގެ އިތުރުން މި މިސްކިތަކީ ހާއްސަ އެހީއަށް ބޭނުންވާ ފަރާތް ތަކަށް ވެސް ފަސޭހައިން ވަދެވޭ ގޮތަށް ބިނާ ކުރެވޭ މިސްކިތެކެވެ.

މާލާ ކޮންސްޓްރަކްޝަނާއި ހަވާލު ކޮށްގެން 20 މިލިއަން ރުފިޔާ ހަރަދުކޮށް ބިނާ ކުރާ މި މިސްކިތުގެ މަސައްކަތް އެއް އަހަރު ދުވަހުގެ ތެރޭ ނިންމާ 1447 ވަނަ އަހަރުގެ ރަމަޟާން މަށް މިސްކިތް ހުޅުވުމަށް ވަނީ އަމާޒު ހިފާފަ އެވެ.

މި މިސްކިތް ހުޅުވުމަށް ފަހު، މިސްކިތުގައި އިލްމީ ދަރުސްތަކާއި ގުރުއާން ހިތު ދަސްކުރުމުގެ މަޝްރޫއުތައް ކުރިއަށް ގެންދެވޭނެ އެވެ.

މި މިސްކިތަކީ، މ. ތައިބާ ޝައިހު އިސްމާއީލު މުޙައްމަދުގެ ދީލަތި އެހީގައި ބިނާ ކުރެވޭ މިސްކިތެކެވެ.