ރީޑިން ނަގާތާ އެއްދުވަސް ތެރޭގައި ކަރަންޓު ބިލު ފޮނުވަން ފަށަނީ

ކުރިއަށް އޮތް އޭޕްރީލް މަހުން ފަށައިގެން ރީޑިން ނަގާތާ އެއްދުވަސްތެރޭގައި ކަރަންޓު ބިލު ފޮނުވާނެ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެ އެވެ.

ޕީއެސްއެމްގެ ޕްރޮގްރާމެއްގައި ވާހަކަދައްކަވަނުން ފަހުމީ ވިދާޅުވީ މި ބަދަލު ގެންނާން ނިންމީ ރައްޔިތުންނަށް ވީހާވެސް ލުއި ފަސޭހަ ގޮތް ތަކެއް ހޯދައިދިނުމުގެ ގޮތުން ކަމަށެވެ. ސްޓެލްކޯއިން މީގެ ކުރީން ބިލު ކުރަމުން އައީ މީޓަރުގެ ރީޑިން ނަގާތާ 20 ނޫނީ 25 ދުވަސް ފަހުންނެވެ.

ފަހުމީ ވިދާޅުވީ އެގޮތަށް ބިލު ފޮނުވުމުން ކަސްޓަރުންނަށް އޮޅުން އަރާ ކަމަށެވެ.

"މިސާލަކަށް މަހެއްގެ ބިލު ފޮނުވީމަ އޭނަ އެބަ ބުނޭ ތިމަންނަ މިދިޔަ ވިހި ވަރަކަށް ދުވަހު ދުވަހު ގެއަކު ނޫޅެމޭ. ރާއްޖެއިން ބޭރުގައޭ މިހުރީ. އެކަމަކު އެ މަހު އެ ފޮނުވެނީ ވޭތުވެދިޔަ ވިހި ދުވަހަކަށް ނޫން. އެ ވިހި ދުވަހުގެ ކުރީގެ ބިލެއް އެ ފޮނުވެނީ،" އޭނާ ވިދާޅުވި އެވެ.

އެމްޑީ ފަހުމީ ވިދާޅުވީ ކުރީގެ މެނޭޖުމެންޓުންވެސް ކަސްޓަމަރަކަށް ހަގީގަތާ ހިލާފު ބިލެއް ފޮނުވާފައި ނޯންނާނެ ކަމަށެވެ.

"އަޅުގަނޑު ޔަގީންކަން މި އަރުވަނީ ކުރީގެ ސަރުކާރަކުންވެސް ކުރީގެ މެނޭޖުމެންޓަކުން ވެސް ހަގީގަތާ ހިލާފު ބިލެއް ނޯންނާނެ އިޝޫކޮށްފައެއް. ހަމަ ރީޑިން ނަގައިގެން މީޓަރަށް އަރާ އެއްޗަކަށް ބިލުކޮށްފައި ހުންނާނީ. މިއީ ދައުލަތުގެ ސައްތައިން ސައްތަ ކުންފުންޏެއް، އެހެންވީމަ އަޅުގަނޑުމެން ނުކުރާނެ އެކަމެއް. ރީޑިން ނެގުމުގައި ވެސް މި ބައިވެރިވަނީ ޑިޕާޓްމެންޓުގެ ހެޑް އެކަންޏެއް ނޫން. 120 މުވައްޒަފުން ބައިވެރިވެގެން އެކި ދިމަދިމާލަށް ގޮސްގެން ރީޑިން މި ނަގަނީ. އެއަށް އެ ޗެކު ކުރުން އޮންނާނެ. އެހެންވީމަ ޗެކްއެންޑް ބެލެންސު ސިސްޓަމެއް އެބައިން ސްޓެލްކޯގަ،" އޭނާ ވިދާޅުވި އެވެ.