ދެ ސައިކަލް ޖެހި ހިނގި އެކްސިޑެންޓެއްގައި އަނިޔާވި ބަޔަކަށް ފަރުވާ ދެނީ

ހުޅުމާލޭގައި ދެ ސައިކަލެއް ޖެހި ހިނގި އެކްސިޑެންޓެއްގައި އަނިޔާވި ބަޔަކަށް ހުޅުމާލޭ ހޮސްޕިޓަލްގައި ފަރުވާ ދޭން ފަށައިފި އެވެ.

ފުލުހުން ބުނީ މިރޭ 7:50 ހާއިރު ހުޅުމާލޭ ދެ ވަނަ ފޭހުގެ ނިރޮޅު މަގު، މުނީ ހޯމް ކެއާ މިސްކިތް ކައިރީގައި ދެ ސައިކަލް ޖެހި އެކްސިޑެންޓުވި މައްސަލަ ފުލުހަށް ރިޕޯޓުކޮށްފައިވާ ކަމަށެވެ.

މި އެކްސިޑެންޓުގައި ސައިކަލް ދުއްވި މީހުންނަށް އަނިޔާ ވެގެން ފަރުވާ ދިނުމަށް ޓަކައި ހުޅުމާލޭ ހޮސްޕިޓަލަށް ގެންގޮސްފައިވާ ކަމަށް ވެސް ފުލުހުން ބުންޏެވެ. އިތުރު ތަފުސީލް ހާމައެއް ނުކުރެ އެވެ.

ފުލުހުން އަންނަނީ މި މައްސަލަ ތަހުގީގު ކުރަމުންނެވެ.

ފާހަގަކޮށްލެވޭ ގޮތުގައި، ހުޅުމާލޭ ނިރޮޅު މަގަކީ މީގެ ކުރީން ވެސް ވަރަށް ނުރައްކާތެރި އެކްސިޑެންޓު ހިނގާފައިވާ މަގެކެވެ.

އެގޮތުން 2019 ވަނަ އަހަރުގެ އޯގަސްޓް މަހުގެ 30 ވަނަ ދުވަހުގެ ރޭ ނިރޮޅު މަގު، ހަބީބު ބޭންކު ކުރިމަތީގައި ހިނގި އެކްސިޑެންޓަކާ ގުޅިގެން މީހަކު މަރުވެސް ވިއެވެ. އެއީ ހ. ފޮއްދޫގޭ އިބްރާހީމް ރަޝީދު، 64، އެވެ. އޭނާ މަރުވީ ބޮލަށް ލިބުނު ޒަހަމް ތަކަކަށް އޭޑީކޭ ހޮސްޕިޓަލުގައި ފަރުވާ ދެމުންދަނިކޮށެވެ.

އެ އެކްސިޑެންޓު ހިނގާފައި ވަނީ އޭނާ ދުއްވި ސައިކަލު ޕާކު ކުރާން އުޅެނިކޮށް ބާރު ސުޕީޑުގައި ދުއްވާފައި އައި އެހެން ސައިކަލެއް މަތަނުވެ ގޮސް ޖެހިގެންނެވެ.

އޭގެ އިތުރުން ވެސް އެ މަގުގައި ދޭތެރެދޭތެރިން އެކި ވަރުގެ އެކްސިޑެންޓު ހިނގާފައިވެ އެވެ.