ހެޔޮގޮތުގައި މުދަލުން ހޭދަ ކުރުމަށް ޑރ. ޝަހީމް ގޮވައިލައްވައިފި

މުދަލަކީ މާތް ﷲ ދެއްވާފައިވާ ވަރަށް ބޮޑު އަމާނާތެއް ކަމަށާއި މުދަލުން ހެޔޮ ގޮތުގައި ހޭދަ ކުރުމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ގޮވައިލައްވައިފި އެވެ.

ޝަހީމް މިކަމަށް ގޮވާލެއްވީ ރޭ ބޭއްވި ފުރަތަމަ އިހުޔާ ފޯރަމްގައި"ހެޔޮ ގޮތުގައި މުދާ ހޯދުމާއި ބޭނުން ކުރުން" މި މައުލޫއަށް ތަގުރީރު ކުރައްވަމުންނެވެ.

ރޭގެ ފޯރަމްގައި ޝަހީމް ވަނީ ގިނަ މައުލޫމާތުތަކެއް ކީރިތި ގުރުއާނާއި ރަސޫލާގެ ސުންނަތުން ދަލީލު ނަންގަވާ އާއްމުންނާއި ހަމައަށް ގެނެސްދެއްވާފަ އެވެ.

އެގޮތުން ވަނީ މުދަލުގެ އަމާނާތް އޭގެ ހައްގުވެރީންނަށް ފޯރުކޮށްދިނުމަށާއި މިސްކީނުންނަށް އެހީތެރިކަން ފޯރުކޮށްދިނުމަށާއި، އެކިގޮތް ގޮތުން އެހީތެރި ކަމަށް ބޭނުންޖެހިފައި ތިބި އެހެން އިންސާނުންނަށް އުފާވެރިކަން ގެނެސްދިނުމަށް އިސްލާމްދީނުގައި ބާރު އަޅާފައިވާކަން ފާހަގަ ކުރައްވާފަ އެވެ.

އެ މަނިކުފާނުގެ ތަގުރީރުގައި ވަނީ ފިތުރު ޒަކާތާއި މުދަލު ޒަކާތާއި ގުޅޭ ގޮތުންވެސް ފުޅާ ދާއިރާއެއްގައި ވާހަކަފުޅު ދައްކަވާފައެވެ. އެގޮތުން ފިތުރު ޒަކާތާއި މުދަލު ޒަކާތް ދެއްކުމުގެ މުހިއްމު ކަމާއި ޒަކާތާއި ގުޅޭ މުހިއްމު ހުކުމްތަކާއި ގުޅޭ މައުލޫމާތާއި އެކަމުގެ އަޖުރާއި ގުޅޭ ގޮތުން ވަނީ ވާހަކަފުޅު ދައްކަވާފަ އެވެ.

"މުދަލުގައި ވާ އެންމެ ބޮޑު ހައްގަކީ ﷲގެ ހައްގު، މުދަލުގެ މައްޗަށް ﷲ އިސްލާމްދީނުގެ ރުކުނެއް ކަނޑައަޅުއްވާފައިވޭ. އެއީ ޒަކާތް ދިނުން،" އެމަނިކުފާނު ވިދާޅުވި އެވެ.

މިގޮތުން ރިޝްވަތަކީ ހަރާން ކުރައްވާފައިވާ ކަމެއް ކަމަށާއި ރިޝްވަތު ދޭ މީހާއާއި ރިޝްވަތު ހިފާ މީހާގެ މެދުވެރިއަކަށް ވާ މީހާއަކީވެސް މާތް ﷲ ލައުނަތްލައްވާފައިވާ މީހެއްކަން ޝަހީމް ފާހަގަ ކުރެއްވި އެވެ. އަދި ހަރާމް މުދާ ކެއުމުގެ ސަބަބުން މާތް ﷲ، އެ މީހަކު ދަންނަވާ ދުއާ އިޖާބަ ނުކުރައްވާނެކަން ވެސް ޝަހީމްގެ ތަގުރީރުގައި ހަނދާންކޮށްދެއްވި އެވެ.