ފެނަކައިގެ ބިލްތަކުން ރޯދަ ޑިސްކައުންޓް ދޭނެ ގޮތް އާންމުކޮށްފި

ރައީސް ޑރ. މުޙައްމަދު މުއިއްޒުގެ ނިންމެވުން ތަންފީޒު ކުރުމުގެ ގޮތުން މި އަހަރުގެ ރަމަޟާންމަހު ވެސް ފެނަކަ ކޯޕަރޭޝަންގެ ކަސްޓަމަރުންގެ ފެނާއި ކަރަންޓު ބިލްތަކަށް ޑިސްކައުންޓް ދޭން ނިންމައިފި އެވެ.  

އެގޮތުން ޑިސްކައުންޓު ލިބޭ ގޮތަކީ:

1. މިދިޔަ އަހަރު އެންމެ ހޫނު ގަދަކަމަށް ފާހަގަ ކުރެވުނު ފެބުރުއަރީ، މާޗު އަދި އޭޕްރީލްގެ ތިން މަސް އުނިކުރުމަށްފަހު، ބާކީ ނުވަ މަހުގެ ފެން އަދި ކަރަންޓު ބިލްގެ އެވްރެޖަށްވާ މިންވަރަށްވުރެ މި ރަމަޟާން މަހުގެ ކަރަންޓު ބިލާއި ފެންބިލުން އިތުވާ މިންވަރު ޑިސްކައުންޓުގެ ގޮތުގައި ހަމަޖެއްސުން.

2. ފާއިތިވި އަހަރުގެ އެވްރެޖާއި މި ރަމަޟާން މަހުގެ ބިލުގެ ފަރަގު ބިލުގެ 10 އިންސައްތައަށްވުރެ ކުޑަ ނަމަ، މުޅި ބިލުން ޖުމުލަ 10 އިންސައްތަ ޑިސްކައުންޓުގެ ގޮތުގައި ހަމަޖެއްސުން.

3. މި ރަމަޟާންމަހުގެ ބިލުގެ އަދަދު ފާއިތުވި އަހަރުގެ އެވްރެޖަށްވުރެ ކުޑަ ނަމަ މުޅި ބިލުން ޖުމުލަ 10 އިންސައްތަ ޑިސްކައުންޓުގެ ގޮތުގައި ހަމަޖެއްސުން.

4. ފެނާއި ކަރަންޓުގެ ހިދުމަތް އަލަށް ހޯދާ ފަރާތްތަކަށް ރަމަޟާންމަހުގެ ބިލުން 10 އިންސައްތަ ޑިސްކައުންޓުގެ ގޮތުގައި ހަމަޖެއްސުން، މިއެވެ.

ފެނަކައިން ބުނިގޮތުގައި މި ޑިސްކައުން ލިބޭނީ ރޯދަ މަހުގެ ޔޫސޭޖަށް ތައްޔާރު ކުރެވޭ ބިލަށެވެ. އެ ބިލު އަންނާނީ އޭޕްރީލް މަހުގެ ކުރީކޮޅު އެވެ.

ރަމަޝާން މަހަކީ އެހެން މަސްމަހާ ހިލާފަށް ރައްޔިތުން އަސާސީ ހިދުމަތަކަށް ކުރާ ހޭދަ ވަރަށް ބޮޑުތަނުން އިތުވާ މަހެކެވެ.

އެހެންކަމުން ރައީސް ޑރ. މުޙައްމަދު މުއިއްޒު ނިންމަވާފައި ވަނީ ފާއިތުވި އަހަރުގެ ރަމަޟާންމަހެކޭ އެއްގޮތަށް މި އަހަރުގެ ރަމަޟާންމަހު ވެސް ރައްޔިތުން ކަރަންޓާއި ފެނުގެ ހިދުމަތަށް ކުރާ ހޭދަ އާންމު މަސްމަހަށްވުރެ، އިތުރު ނުވާނެ ގޮތަކަށް ލުއި ދެއްވުމަށެވެ.

ފެނަކައިން މިދޭ ޑިސްކައުންޓަކީ ވެސް ރައީސްގެ އެ ނިންމެވުން ތަންފީޒު ކުރުމުގެ ގޮތުން ފެނާއި ކަރަންޓު ބިލްތަކަށް ދެވޭ ޑިސްކައުންޓެކެވެ.