މަގުމައްޗަށް ކުނި ނުނެރުމަށް ވެމްކޯއިން އިލްތިމާސްކޮށްފި

މާލޭ މަގުމަތީގައި ބަހައްޓާފައި ހުރި ކުނިތަކެއް -- މިހާރު ފޮޓޯ

އެއްވެސް ގެއަކުން މަގުމައްޗަށް ކުނި ނުނެރުމަށް ވޭސްޓް މެނޭޖުމެންޓް ކޯޕަރޭޝަން (ވެމްކޯ) އިން އިލްތިމާސްކޮށްފި އެވެ.

ވެމްކޯއިން ބުނީ މި ހަފްތާއަކީ ވިއްސާރަ ހަފްތާއެއްކަމުގައިވީ ނަމަވެސް ރައްޔިތުންނަށް މެދުނުކެނޑި ހިދުމަތް ފޯރުކޮށްދިނުމަށް ޓަކައި އެ ކުންފުނީގެ މުވައްޒަފުން މެދުނުކެނޑި މަސައްކަތް ކުރަމުން އަންނަ ކަމަށެވެ.

އެހެންނަމަވެސް، ވިއްސާރަވުމުގެ ސަބަބުން އެއްވެސް ގެއަކުން ކުނި ނުނެގި ހުރެއްޖެ ނަމަ، އެ ކުނި މައްޗަށް ނުވަތަ އާންމު ސަރަހައްދު ތަކަށް ނުނެރުމަށް އެ އެ ކުންފުނިން އިލްތިމާސް ކުރެ އެވެ.

ވެމްކޯއިން ވަނީ ކުނި ނުނެގި ހުރި ގެއެއް ފާހަގަ ކުރެވިއްޖެ ނަމަ ނުވަތަ ހިދުމަތް ނުލިބޭ ނަމަ އެ ކުންފުނީގެ ހޮޓްލައިން 1666އަށް ގުޅައިގެން އެ މައުލޫމާތު ހިއްސާ ކުރުމަށް ވެސް އެދިފަ އެވެ.

މަގުމައްޗަށް ކުނި ނުނެރުމަށް ވެމްކޯއިން އިލްތިމާސްކޮށްފައިވާއިރު، އެ ކުންފުނިން ވަނީ ރޯމަ މަހު މާލޭ ގޭބިސީ ތަކުން ކުނި ނަގާ ވަގުތު ތަކަށް ބަދަލު ގެނެސްފަ އެވެ.

އެ ބަދަލުގެ ތެރޭގައި މާލޭ ގޭބިސީ ތަކުން ކުނި ނެގުމުގެ ހިދުމަތް ދޭނީ ރޭގަނޑު 8:30 އިން ފަށައިގެން މެންދަމުން އަލިވެ، 2:30އަށެވެ. ހުޅުމާލޭގައި މި ރޯދަ މަހު ކުނި ނެގުމުގެ ހިދުމަތް ދޭނީ ރޭގަނޑު 9:00އިން 1:00އަށެވެ.

އޭގެ އިތުރުން ވިލިމާލޭގައި މި ހިދުމަތް ދޭނީ ރޭގަނޑު 9:30 އިން ފަށައިގެން ދަންވަރު 1:30އާ ހަމައަށެވެ.

ވެމްކޯ