ފުލެޓު ލިސްޓަށް ޝަކުވާ ހުށަހަޅަން ފުރުސަތު ހުޅުވާލައިފި

ހިޔާ ޓަވަރު -- އަސަދު ފޮޓޯ

ގެދޮރުވެރިޔާ ޕޯޓަލް މެދުވެރިކޮށް މިއަދުން ފަށައިގެން ފުލެޓު ލިސްޓަށް ޝަކުވާ ހުށަހަޅަން ފުރުސަތު ހުޅުވާލައިފި އެވެ.

މި ސަރުކާރުން އާންމު ކުރި އައު ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލީ މިއަދުން ފަށައިގެން މި މަހުގެ 31ގެ ނިޔަލަށެވެ.

ހައުސިން މިނިސްޓްރީން ކުރި އެކްސް ޕޯސްޓުގައި ބުނީ ފޯމު ހުށަހަޅާފައިވާ ފަރާތެއް ނަމަ، އެ ފަރާތުގެ ފޯމާއި ގުޅޭ ޝަކުވާ "ގެދޮރުވެރިޔާ ޕޯޓަލް" މެދުވެރިކޮށް ހުށަހެޅޭނެ ކަމަށެވެ.

އޭގެ އިތުރުން ލިސްޓުގައިވާ ފަރާތަކާ ގުޅޭ ޝަކުވާއެއް ނަމަ gedhoruveriya@infrastructure.gov.mv އީމެއިލް އަށް ނުވަތަ މިނިސްޓްރީ އަށް އެޑްރެސްކޮށް، ފޮނުވޭ ސިޓީއަކުން ހުށަހެޅޭ ކަމަށް އެ މިނިސްޓްރީން ބުންޏެވެ.

ޝަކުވާ ހުށަހެޅުމުގެ މުއްދަތުގެ ތެރޭގައި ޝަކުވާ ހުށަހެޅުމުގެ ކަންކަން ކުރިއަށް ގެންދާނެ ގޮތާއި ގުޅޭ އިތުރު މައުލޫމާތު ސާފު ކުރުމަށް އެ މިނިސްޓްރީގެ ނަންބަރު،4004911 އަދި 4004910 ފޯނަށް ގުޅައިގެން މައުލޫމާތު ސާފު ކުރެވޭނެ އެވެ.

މި ސަރުކާރުން ރިވިއުކޮށް މިހާރު ގެޒެޓްކޮށްފައިވާ ލިސްޓުގައި ޝަރުތު ހަމަވާ ކަމަށް ކަނޑައަޅާފައި ވަނީ 1820 މީހުންނެވެ.

ހައުސިންގ މިނިސްޓްރީ