އިސްލާމީ ގައުމުތަކުގެ ވެރީންނަށް ރޯދަ މަހުގެ ތަހުނިޔާ ފޮނުއްވައިފި

ރަމަޟާންމަހުގެ މުނާސަބަތުގައި ރައީސް ޑރ. މުޙައްމަދު މުއިއްޒު އެ މަނިކުފާނުގެ އަމިއްލަ ނަންފުޅުގައްޔާއި، ދިވެހި ސަރުކާރާއި ދިވެހި ރައްޔިތުންގެ ނަމުގައި، އިސްލާމީ ގައުމު ތަކުގެ ލީޑަރުންނާއި، ސަރުކާރުތަކާއި ރައްޔިތުންނަށް ތަހުނިޔާ އަރިސް ކުރައްވައިފި އެވެ.

އިސްލާމީ ގައުމުތަކުގެ ލީޑަރުންނަށް ފޮނުއްވި މެސެޖުގައި އެ މަނިކުފާނު ވަނީ، މި މައްސަރަކީ ރޫހު އާލާކޮށް، މުރާޖައާ ކުރުމާއި އެއްބައިވަން ތަކަމުގެ މައްސަރު ކަމާއި، އޯގާތެރި ކަމާއި، ދީލަތިކަން އިތުރުކޮށް، އަގީދާ ހަރުދަނާ ކުރުމުގެ މައްސަރު ކަމުގެ މައްޗަށް އަލިއަޅުއްވާލައްވާފަ އެވެ.

މި ރަމަޟާންމަހު، އެކުވެރި ކަމުގެ ގުޅުންތައް ހަރުދަނާ ކުރެވި، ހިދުމަތް ކުރުމުގެ އަޒުމު ވަރުގަދަވެގެންދާނޭ ކަމަށް އުއްމީދު ކުރައްވާ ކަމަށް ވެސް އެ މަނިކުފާނު ވިދާޅުވެފައިވެ އެވެ. އަދި އިސްލާމީ ގައުމު ތަކުގެ ވެރީންނާއި ރައްޔިތުން ފުރިހަމަ ސިއްހަތެއްގައި ލެހެއްޓެވުމަށާއި، ކާމިޔާބީ މިންވަރު ކުރެއްވުމަށް އެދިވަޑައިގެން ރައީސް ދުއާ ދަންނަވާފައިވެ އެވެ.

ރައީސް ވަނީ ފަލަސްތީނުގެ ގައްޒާ އާއި ހުޅަނގު އައްސޭރީގައި ތިބި މުސްލިމުން ތަހައްމަލު ކުރަމުންދާ ވޭނަށް ތަސައްލީއެއް ހޯދައިދިނުމުގައި ހަރަކާތް އަވަސް ކުރުމަށް އިސްލާމީ އުންމަތަށް އިލްތިމާސް ކުރައްވާފަ އެވެ.

އޭގެ އިތުރުން މުސްތަގިއްލުކަން ހޯދުމަށް ފަލަސްތީނުން ކުރާ މަސައްކަތަށް އަދުލުވެރި އަދި ދެމެހެއްޓެނިވި ހައްލެއް ހޯދައިދީ،1967 ވަނަ އަހަރުގެ ކުރިން ކަނޑައަޅާފައިވާ ބޯޑަރު ތަކުގެ މައްޗަށް ބިނާކޮށް، ފަލަސްތީނުގެ މިނިވަން އަދި އިސްތިގުލާލީ ދައުލަތެއް ގާއިމު ކުރެވި، އިރުމަތީ ގުދުސްއަކީ ފަލަސްތީނުގެ ވެރިރަށް ކަމުގައި ކަށަވަރުކޮށްދެއްވުމަށް އެ މަނިކުފާނު ވަނީ އިސްލާމީ އުންމަތަށް އިލްތިމާސް ކުރައްވާފަ އެވެ.