ރަސްމީ ފާލަން ތަރައްގީ ކުރުމުގައި އުޅުނު އެމްޓީސީސީ މުވައްޒަފުންގެ އަގު ވަޒަންކޮށްފި

އިއްޒުއްދީން ފާލަން އަލުން ތަރައްގީ ކުރުމުގެ މަސައްކަތުގައި އަމަލީ ގޮތުން ބައިވެރިވި އެމްޓީސީސީގެ މުވައްޒަފުން ގެ އަގު ވަޒަން ކޮށްފި އެވެ.

އަގުވަޒަންކުރުމަށް ހާއްސަކޮށް ރޭ ބޭއްވި ހަފުލާ އޮތީ، އިސްލާމީ މަރުކަޒުގެ ޖަލްސާ ކުރާ މާލަމުގައެވެ.

މި ހަފްލާގައި އިއްޒުއްދީން ފާލަން އަލުން ތަރައްގީ ކުރުމުގައި އަމަލީ ގޮތުން ބައިވެރިވި އެ ކުންފުނީގެ ހުރިހާ މުވައްޒަފުންނަށް ވަނީ ހަނދާނީ ލިޔުން ދީފައެވެ.

ކުންފުނީގެ ބޯޑުގެ ޗެއާމަން އާއި ޑިރެކްޓަރުންނާއި މޭނޭޖުމަންޓް ޓީމު ބައިވެރިވި މި ހަފުލާގައި މުވައްޒަފުންނަށް އަގުވަޒަން ކުރުމުގެ ހަނދާނީ ލިޔުން ހަވާލުކޮށްދެއްވީ، އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ އެވެ.

މި ހަފުލާގައި ސައުދީ ދެއްކެވި ވާހަކަފުޅުގައި ފާލަން އަލުން ތަރައްގީ ކުރުމުގައި މުވައްޒަފުން ދެއްކި ވަރުގަދަ އަޒުމާއި ހިތްވަރު ފާހަގަ ކުރައްވައި އެ މުވައްޒަފުން ކޮށްދިން އަގުހުރި މަސައްކަތަށް ތައުރީފު ކުރައްވާފައިވެ އެވެ.

ދިވެހީންގެ ގައުމިއްޔަތު ރަމްޒުކޮށްދޭ އިއްޒުއްދީން ފާލަން އަލުން ތަރައްގީ ކުރުމުގެ މަޝްރޫއު މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން އެމްޓީސީސީއާ ހަވާލުކުރުމާ ގުޅިގެން މި މަޝްރޫއުގެ އަމަލީ މަސައްކަތްމި އެ ކުންފުނިން ފެށީ 2024 ވަނަ އަހަރުގެ މެއި މަހުގެ ތެރޭގައެވެ.

ރަސްމީ ދަތުރުފުޅު ތަކުގައި ރާއްޖެއަށް ޒިޔާރަތް ކުރައްވާ ބޭރު ގައުމު ތަކުގެ އިސް ވެރީންނާއި އިއްޒަތްތެރީން މާލެއަށް ފައިބައިވަޑައިގަތުމަށް ބޭނުން ކުރައްވާ އިއްޒުއްދީން ފާލަމަކީ ރާއްޖޭގެ ޢިއްޒަތާއ، ސިޔާދަތާއ، ދިވެހީންގެ އަމިއްލަވަންތަ ކަން ރަމުޒު ކޮށްދޭ މުހިންމު ބިނާއެކެވެ.

އެމްޓީސީސީން ބުނީ އެ ފާލަން އިހުގެ ގޮތަށް އަލުން ތަރައްގީކޮށް ނިންމާލިއިރު، ފާލަން ޒީނަތްތެރި ކުރުމަށް ޓަކައި ބޭނުން ކޮށްފައި ހުރި ވަޑާމުގެ ވަރަށް ގިނަ މަސައްކަތް ތަކަކީ އެ ކުންފުނީގެ މުވައްޒަފުން، ކުންފުނީގެ ވޯކްޝޮޕް ތަކުގައި ކޮށްފައިވާ، އެ މުވައްޒަފުންގެ ފަންނުވެރިކަން ވަރަށް ފުރިހަމަޔަށް ދައްކުވައިދޭ މަސައްކަތް ތަކެއް ކަމަށެވެ.