އިހަވަންދޫ ސިއްހީ މަރުކަޒުގައި ޑައިލަސިސްގެ ހިދުމަތް ފައްޓައިފި

ހއ. އިހަވަންދޫގައި ހުންނަ އާމިނާދިޔޯ ސިއްހީ މަރުކަޒުގައި ޑައިލިސިސް ހިދުމަތް ދޭން ފަށައިފި އެވެ.

މިކަމަށް ޓަކައި މިއަދު ހަވީރު އިހަވަންދޫ ސުކޫލުގައި ބޭއްވި ރަސްމިއްޔާތެއްގައި މި ހިދުމަތް ރަސްމީކޮށް ފައްޓަވައިދެއްވީ ރައީސުލްޖުމްހޫރިއްޔާގެ އަނބިކަނބަލުން  މެޑަމް ސާޖިދާ މުޙައްމަދެވެ.

މިއަދުގެ ރަސްމިއްޔާތުގައި މެޑަމް ސާޖިދާ ދެއްކެވި ވާހަކަފުޅުގައި، ޑައިލިސިސްގެ ހިދުމަތް އަމިއްލަ ރަށުގައި ތިބެގެން ލިބޭނެ މަގު ފަހިވެގެން ދިއުމުގެ މުހިންމު ކަމުގެ މައްޗަށް އަލިއަޅުވާލެއްވި އެވެ.

އެގޮތުން އެ ކަމަނާ ވަނީ ރައީސް ޑރ. މުއިއްޒު، ވަރަށް ހާއްސަކަމެއް ދެއްވައިގެން އެ މަނިކުފާނުގެ އިސްނެންގެވުމާއެކު ރާއްޖޭގެ އެކި ކަންކޮޅު ތަކުގައި ޑައިލިސިސްގެ ހިދުމަތް ދެވޭ މަރުކަޒުތައް އިތުރު ކުރެއްވުމަށް ކުރައްވަމުން ގެންދަވާ މަސައްކަތްޕުޅުތައް ފާހަގަ ކުރައްވާފައިވެ އެވެ.

އެ ކަމަނާގެ މި ދަތުރުފުޅުގައި، އާމިނާދިޔޯ ސިއްހީ މަރުކަޒަށް ޒިޔާރަތް ކުރައްވައި، އެ މަރުކަޒުގައި ޑައިލިސިސް ހިދުމަތް ދިނުމަށް ކުރެވިފައިވާ އިންތިޒާމުތައް ބައްލަވާލައްވައި، އެތަނުގެ ހިދުމަތްތަކާ ބެހޭ މައުލޫމާތު ހޯއްދަވާފައިވެ އެވެ.

މި ހިދުމަތް ފައްޓަވައިދެއްވުމާއެކު އެއް ބޭފުޅަކު މިއަދު ވަނީ ޑައިލިސިސްގެ ހިދުމަތް އެ މަރުކަޒުން ހޯއްދަވާފަ އެވެ.

އެ ރަށުގައި ޑައިލިސިސްގެ ފަރުވާ ބޭނުންވާ ޖުމުލަ ހަ މީހަކު ދިރިއުޅެ އެވެ. ސިއްހީ މަރުކަޒުގެ ނަރުހުންނާއެކު މި ހިދުމަތް މިއަދު ފެށިއިރު، އެ މަރުކަޒުގައި މިއަދު ވަނީ ފިޒީޝަނެއްގެ ހިދުމަތް ވެސް ދޭން ފައްޓާފަ އެވެ.

އިހަވަންދޫގެ ސިއްހީ ނިޒާމު ވަރުގަދަ ކުރުމަށް ޓަކައި ވެރިކަމުގެ ފުރަތަމަ އަހަރުގެ ތެރޭގައި އެ ރަށުގައި ފެންވަރު ރަނގަޅު ހޮސްޕިޓަލެއް ގާއިމު ކުރުމަކީ ހަފްތާ 14 ގައި ހިމެނޭ ރައީސް މުއިއްޒުގެ ވައުދު ތަކުގެ ތެރެއިން ވައުދެކެވެ.