ޔޫތު މިނިސްޓްރީއިން މިއަހަރުގެ ޒުވާނުންގެ އެވޯޑަށް ނަން ހުށެހެޅުމުގެ ފުރުސަތު ހުޅުވާލައިފިއެވެ.

މި އަހަރު އެވޯޑް ވަނީ 17 ދާއިރާއަކުން ދޭން ނިންމައިފައެވެ.

މި އިނާމަށް ކުރިމަތި ލުމަށް ހުޅަހަޅާފައިވާ އިރު، ގޫގުލް ލިންކް ބޭނުން ކޮށްގެން އިންޓާނެޓްގެ ޒަރިއްޔާއިން ވެސް ފޯމް ހުށަހެޅޭނެއެވެ. އަދި ސޯޝަލް ސެންޓަރުގައި ހުންނަ މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާރޓްސް އިން ވެސް ފޯމް ބަލައިގަންނާނެއެވެ. އިނާމަށް ފޯމު ހުށަހެޅޭނީ އަންނަ މަހުގެ ހަތަރު ވަނަ ދުވަހުގެ 13:00ގެ ނިޔަލަށެވެ.

ސަރުކާރު ބަންދު ނޫން ކޮންމެ ދުވަހެއްގެ ހެނދުނު 8:30 އިން މެންދުރު 13:30 އަށް ފޯމް ބަލައިގަތުމަށް ވަނީ ނިންމަވައިފައެވެ. ރަށްރަށުން އެޕްލިކޭޝަން ހުށަހަޅާ ފަރާތްތަކުން މިނިސްޓްރީގެ މެއިލް info@youth.gov.mv މެދުވެރިކޮށް އެޕްލިކޭޝަން ހުށަހެޅުމަށް ވަނީ އެދިފައެވެ.

ޒުވާނުންގެ އެވޯޑު ލިބޭ ފަރާތްތަކަށް އިނާމުގެ ގޮތުގައި ޒުވާނުންނަށް ދެވޭ ހާއްސަ އެވޯޑާއި އަދި ސެޓްފިކެޓް ލިބިގެންދާނެއެވެ.

ޒުވާނުންގެ އިނާމަކީ ތަފާތު ދާއިރާތަކުން ގައުމުގެ ތަރައްގީއަށް ޒުވާނުން ކުރާ އަގުހުރި މަސައްކަތްތައް ފާހަގަކޮށް ހިތްވަރު ދިނުމުގެ ގޮތުން ދެވޭ އިނާމެކެވެ. އަދި މި އިނާމަކީ ޤައުމުގެ ތަރައްގީގައި ޒުވާނުން އަދާކުރާ މުހިންމު ދައުރު ފާހަގަކޮށް ޒުވާނުންނަކީ މުޖުތަމައުއަށް ފައިދާ ހުރި، އުފެއްދުންތެރި، ޒިންމާދާރު ބަޔަކަށް ހެދުމަށް ބާރުއަޅައި، ވާގި ދިނުމުގެ ގޮތުން ދެވޭ އިނާމެކެވެ.