ގައުމީ އަންހެން ބާސްކެޓްބޯޅަ ޓީމުގެ ހިތްވަރަށް ރައީސް މުއިއްޒު ސާބަސް ދެއްވައިފި

ގައުމީ އަންހެން ބާސްކެޓް ބޯޅަ ޓީމް

އިންޑިއާގެ ނިއުދިއްލީގައި ބޭއްވި ތިން ވަނަ ސާބާ އަންހެން ބާސްކެޓްބޯޅަ މުބާރާތުން، ފުރަތަމަ ފަހަރަށް ރާއްޖެއަށް ރިހި މެޑަލް ހޯދައިދިން ދިވެހި ގައުމީ ޓީމުން ދެއްކި ރީތި ކުޅުމާއި ކުރި ހިތްވަރު ފާހަގަ ކުރައްވައި ރައީސް ޑރ. މުޙައްމަދު މުއިއްޒު އެ ޓީމަށް ސާބަސް ދެއްވައިފި އެވެ.

ގައުމީ އަންހެން ބާސްކެޓްބޯޅަ ޓީމުން މި ހޯދި ފަހުރުވެރި އެ ކާމިޔާބީއަށް މަރުހަބާ ވިދާޅުވެ، ރައީސް، މިއަދު ކުރެއްވި އެކްސް ޕޯސްޓުގައި އެ މަނިކުފާނު ވަނީ، މުބާރާތުގެ ފައިނަލުގައި ރާއްޖެ އާއި އިންޑިއާ ވާދަ ކުރި މެޗުގައި ދިވެހި ގައުމީ ޓީމުން ދެއްކި ރީތި ކުޅުމާއި ކުރި ހިތްވަރަށް ސާބަސް ދެއްވާފަ އެވެ.

"މުބާރާތުގެ ފައިނަލުގައި ދިވެހިރާއްޖެ އާއި އިންޑިއާ ވާދަކުރި މެޗުގައި ދިވެހި ގައުމީ ޓީމުން ދެއްކި ރީތި ކުޅުމާއި ކުރި ހިތްވަރަށް ސާބަސް،" ރައީސް ވިދާޅުވި އެވެ.

މި މަހުގެ 26 ވަނަ ދުވަހު ނިއުދިއްލީގައި ކުޅުނު މުބާރާތުގެ ފައިނަލްމެޗުން ދިވެހި ޓީމުގެ މައްޗަށް އިންޑިއާ ޓީމުން ކުރި ހޯދީ، 107-32 ގެ ނަތީޖާއަކުންނެވެ. މިއީ ސާބާ އަންހެން ބާސްކެޓްބޯޅަ މުބާރާތަކުން ދިވެހި ޓީމަށް ރިހި މެޑަލް ލިބުނު ފުރަތަމަ ފަހަރެވެ.

މީގެ ކުރީން ދެ ފަހަރެއްގެ މަތީން ދިވެހި ގައުމީ ޓީމުން ވަނީ މި މުބާރާތުގެ ލޯ މެޑަލް ހޯދާފަ އެވެ.

އެއީ 2016 ވަނަ އަހަރާއި 2022 ވަނަ އަހަރުގަ އެވެ.

ރައީސް ޑރ މުޢިއްޒު