ޒަކާތު ހައުސް އުފެއްދުމަކީ ރައީސް އެޅުއްވި ހަރުދަނާ ފިޔަވަޅެއް: ޝަހީމް

ޒަކާތު ހައުސް އުފެއްދުމަކީ ރައީސް ޑރ. މުޙައްމަދު މުއިއްޒު އެޅުއްވި ވަރަށް ހަރުދަނާ ފިޔަވަޅެއް ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވެއް އެވެ.

މީރާގެ ވާރުޕޭ މެދުވެރިކޮށް ހެޔޮކަން ކަމަށް ހޭދަ ކުރުމުގެ ފުރުސަތު ހުޅުވައިލުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޝަހީމް ވިދާޅުވީ ޒަކާތު ހައުސް އުފައްދައި ޒަކާތުގެ ނިޒާމު ހަރުދަނާ ކުރުމަށް ރައީސްގެ އިރުޝާދުގެ ދަށުން ކުރި މަސައްކަތް ތަކުގެ ނަތީޖާ މިހާރު ފެންނާން ފަށާފައިވާ ކަމަށެވެ.

މިނިސްޓަރު ވިދާޅުވީ، ޒަކާތަށް ހޭލުންތެރި ކުރުމަށް ކުރަމުން އަންނަ މަސައްކަތް ތަކުގެ ދަށުން މިދިޔަ އަހަރަކީ ޒަކާތުގެ ގޮތުގައި އެންމެ ގިނަ ފައިސާ ލިބުނު އަހަރު ކަމަށާއި މި ކަމުގައި އެންމެ ބޮޑު އެހީތެރި ކަމެއް ލިބުނީ މީރާގައި ޒަކާތުގެ މަސައްކަތް ކުރާ މުވައްޒަފުންގެ ފަރާތުން ކަމަށެވެ.

އަދި ކުރިއަށް އޮތް ތަނުގައި ޒަކާތު ހައުސުން ކުރިއަށް ގެންދާ އެކި ތަމުރީން ޕްރޮގުރާމް ތަކާއި ތަޖުރިބާ ދަތުރު ތަކުގައި ވެސް މީރާގެ ޒަކާތާއި ގުޅޭ މުވައްޒަފުން ބައިވެރި ކުރާނެ ކަމަށް އެ މަނިކުފާނު ވިދާޅުވި އެވެ.

ދިވެހި ރާއްޖޭގެ ޒަކާތު ހައުސްގެ ނަމުގައި ސަރުކާރުގެ ވަކި ހާއްސަ އިދާރާއެއް ގާއިމު ކުރީ، ރާއްޖޭގެ ޒަކާތުގެ ނިޒާމު ހަރުދަނާ ކުރުމުގެ މަސައްކަތާއި، ޒަކާތުގެ ނަފާ އޭގެ ބެހެނިވެރީންނަށް ފުޅާ ދާއިރާއެއްގައި ލިބޭނެ ގޮތަށް ޒަކާތު ފަންޑު ތަރައްގީ ކުރުމުގެ ބޭނުމުގަ އެވެ.

ޒަކާތާ ބެހޭ ވަކި މުއައްސަސާއެއް އުފެއްދުމަކީ ރައީސްގެ ރިޔާސީ ވައުދުފުޅު ތަކުގެ ތެރޭގައި ހިމެނޭ ކަމެކެވެ.