ނޭޝަނަލް މެންޓަލް ހެލްތު ސްޓެރެޓީޖިކް އެކްޝަން ޕްލޭން މެޑަމް ސާޖިދާ އިފުތިތާހުކޮށްދެއްވައިފި

ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، 2025 އިން 2029 އަށް ކަނޑައަޅާފައިވާ ފަސް އަހަރު ދުވަހުގެ ނެޝަނަލް މެންޓަލް ހެލްތު ސްޓެރެޓީޖިކް އެކްޝަން ޕްލޭން  އިފުތިތާހުކޮށް ދެއްވައިފި އެވެ.

އެކަމަނާ މި ޕްލޭން އިފުތިތާހުކޮށްދެއްވީ މިރޭ މިނިސްޓްރީ އޮފް ހެލްތުގައި މިކަމަށް ޓަކައި ބޭއްވި ހާއްސަ ރަސްމިއްޔާތެއްގައެވެ.

މިރޭ ތައާރަފު ކުރި އެކްޝަން ޕްލޭންގައި ކުރިއަށް އޮތް ފަސް އަހަރަށް ރާއްޖޭގެ ނަފުސާނީ ސިއްހަތުގެ ނިޒާމު ހަރުދަނާ ކުރުމަށް ގިނަ ކަންތައް ތަކެއް ހިމަނާފައިވެ އެވެ.

މިއީ ނަފްސާނީ ސިއްހަތުގެ ހިދުމަތްތައް ހަރުދަނާ ކުރުމާއި، ފަރުވާގެ ކަންކަން ފުޅާ ކުރުމުގެ އިތުރުން، ނަފުސާނީ ދުޅަހެޔޮކަން ކުރި އެރުވުމާއެކު ރާއްޖޭގެ ނަފުސާނީ އިއްހަތުގެ ނިޒާމު ހަރުދަނާ ކުރުމުގެ މަގުސަދުގައި އިފުތިތާހު ކުރި ޕްލޭނެކެވެ.

މިގޮތުން މި ޕްލޭން އެކުލަވައިލާފައިވާ ކަންކަމުގެ ތެރޭގައި ޕްރައިމަރީ ހެލްތު ކެއާގެ ތެރެއިން ނަފުސާނީ ހިދުމަތްތައް ފޯރުކޮށްދިނުމުގެ ނިޒާމް ހަރުދަނާ ކުރުމާއި، ނަފުސާނީ ސިއްހަތަށް ހޭލުންތެރިކަން އިތުރުކޮށް އެ ކަމަށް ބޭނުންވާ އެހީތެރިކަން ފޯރުކޮށްދިނުމާއި، ސިޔާސަތު ތަކާއި، ސްޓޭންޑާޑް ތަކާއި، ގައިޑްލައިންތައް އެކުލަވައިލުމާއި، ސިއްހީ ހިދުމަތްތެރީންގެ ހުނަރު އިތުރު ކުރުމާއި، ނަފުސާނީ ބަލި ތަކާމެދު އޮންނަ ނޭދެވޭ ވިސްނުން ނައްތައިލުމަށް ކުރާން ޖެހޭ މަސައްކަތްތައް ހިމެނެ އެވެ.

މީގެ އިތުރުން މި ޕްލޭންގައި އެކި އުމުރު ފުރާގެ މީހުންނަށް، ހާއްސަކޮށް ކުޑަކުދީންނާއި، އުމުރުން ދުވަސްވީ މީހުންނާއި، އެކިއެކި ނާޒުކު ހާލަތް ތަކުގައި ތިބޭ މީހުންގެ ނަފްސާނީ ސިއްހަތަށް އަހަންމިއްޔަތު ކަން ދިނުމަށް އިސްކަން ދީފައިވެ އެވެ.

ހަމައެއާއިއެކު ދުޅަހެޔޮ މުޖުތަމައުއެއް ބިނާ ކުރުމަށް އެ މުޖުތަމައު އަކީ، ނަފުސާނީ ގޮތުން ބާރުވެރި އަދި ގާބިލު ބަޔަކު ދިރިއުޅޭ މުޖުތަމައު އަކަށް ހެދުމަށް ކަމާއި ގުޅުންހުރި ހުރިހާ ފަރާތް ތަކެއް އެކުގައި މަސައްކަތް ކުރުމަށް ވެސް މި ޕްލޭން ބާރު އަޅަ އެވެ.

ރާއްޖޭގައި ނަފުސާނީ ސިއްހަތު ކުރި އެރުވުމަކީ މި ސަރުކާރުން، ހާއްސަކޮށް ރައީސްގެ އެންމެ އަހަންމިއްޔަތުކަން ދެއްވާ ސިޔާސަތު ތަކުގެ ތެރޭގައި ހިމެނޭ ކަމެކެވެ.