ބަންގި މުބާރާތުގެ ފަހުރުވެރި އެއްވަނަ ސުލައިމާނަށް

އިސްލާމީ ކަންތައްތަކާ ބެހޭ ވުޒާރާއިން މުޅިން އަލަށް ބާއްވަން ފެށި ނޫރުލް އަޛާން ބަންގި މުބާރާތުގެ ފަހުރުވެރި އެއްވަނަ ސުލައިމް މުޙައްމަދު ލަތީފް ހާސިލު ކޮށްފި އެވެ.

މި މުބާރާތުގެ ފައިނަލް ރައުންޑް ބާއްވާފައި ވަނީ މިރެ އެވެ. މި ރައުންޑުގައި ހަ ބައިވެރިއަކު ވާދަކުރި އިރު، ބައިވެރީންނަށް ހަވާލު ކުރި މަސައްކަތަކީ ހިޖާޒް ރާގަށް ބަންގިއާއި ގަމަތް ދިނުމެވެ.

މުބާރާތުގެ އެއްވަނަ ހާސިލު ކުރި ސުލައިމާނަށް ޓްރޮފީ އާއި ހަނދާނީ ލިޔުމުގެ އިތުރުން ހާއްސަ އިނާމު ތަކެއްގެ ގޮތުގައި 75 އިންޗީގެ ޓީވީ އަކާއި، ދިގުފަރު އައިލެންޑް ރިޒޯޓުގެ ސްޓޭ އަކާއި، އެސްޓީއޯގެ ހާއްސަ އިނާމެއް ވެސް ވަނީ ދީފަ އެވެ.

މި އިނާމުތައް ހަވާލު ކޮށްދެއްވީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އެވެ.

މި މުބާރާތުގެ ދެވަނަ ހާސިލު ކުރީ ހަމްޒާ ބިން ހަސަން އެވެ. އަދި ތިން ވަނަ ހާސިލު ކޮށްފައި ވަނީ މުޙައްމަދު ހަނޫން ހުސައިން އެވެ. ހަތަރު ވަނަ ހަނީޒް ހަނީފްއަށް ލިބުނުއިރު ފަސް ވަނަ ލިބިފައި ވަނީ އިސްމާއީލް އިފްރާހު އިބްރާހިމް އަލީ އަށެވެ. ހަ ވަނަ ލިބިފައި ވަނީ މާތިއު އަޙްމަދު ނާޒިމް އަށެވެ. މި ހުރިހާ ބައިވެރީންނަށް ވެސް ވަނީ ޓްރޮފީ އާއި ހަނދާނީ ލިޔުމާއި ހާއްސަ އިނާމު ތަކެއް ދީފަ އެވެ.

މި މުބާރާތުގެ މަގުސަދަކީ ރީތި ރާގު ތަކަށް ސައްހަ މަގުން ހުނަރުވެރި ކަމާއެކު ބަންގި ދޭ ޒުވާނުން ތަކެއް އުފެއްދުމާއި ޒުވާނުންނާއި ކުދިބޮޑު އެންމެންގެ ހިތް ތަކުގައި އެކަމަށް ޝައުގުވެރިކަން އުފެއްދުމާއި ގައުމުގެ އިސްލާމީ ޝަހުސިއްޔަތު ވަރުގަދަ ކުރުމާއި ރީތިކޮށް ބަންގި ދޭ ޒުވާނުންގެ ޕޫލެއް އެކުލަވާލުމާއި މި ފަންނުގެ ރޫހު އާލާކުރުމާއި ދިރުވުމާއި ކުރިއެރުވުމެވެ.

އޭގެ އިތުރުން މިއީ ދާއިރާ އެއްގެ ގޮތުގައި ފާހަގަކޮށް މި ދާއިރާގައި އުޅޭ ފަރާތްތަކުގެ އަގު ވަޒަން ކުރުމާއި މާލެ އާއި މުޅި ރާއްޖޭގެ މުސްތަގުބަލުގެ އިސްލާމީ ޝަހުސިއްޔަތު ވަރުގަދަ ކުރުމަކީ ވެސް މަގުސަދުގެ ތެރޭގައި ހިމެނޭ ކަންކަމެވެ.

މި މުބާރާތުން ވަނަ ތަކަށް އަންނަ ބައިވެރީންނަށް އިނާމު ދިނުމަށް ނިންމާފައިވާއިރު، 1446 ވަނަ އަހަރުގެ ރޯދަ މަހު މާލޭގެ ބޮޑެތި މިސްކިތް ތަކުގައި ހުކުރު ނަމާދުގެ ބަންގި ގޮވުމުގެ ފުރުސަތު ދިނުމަށް ވެސް ވަނީ ހަމަޖައްސާފަ އެވެ.