ރައްޔިތުންގެ ސަލާމަތަށް ނުރައްކަލެއް ވެދާނެ ކަމަކަށް މި ސަރުކާރުން ޖާގަ ނުދޭނެ

ރައްޔިތުންގެ ސަލާމަތަށް ނުރައްކަލެއް ވެދާނެ ކަމަކަށް މި ސަރުކާރުން ޖާގަ ނުދޭނެ ކަމަށް ނައިބު ރައީސް ހުސައިން މުޙައްމަދު ލަތީފް ވިދާޅުވެއްޖެ އެވެ.

ނައިބު ރައީސް މިރޭ ކުރެއްވި އެކްސް ޕޯސްޓެއްގައި ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރަކީ ގާނޫނާ ހިލާފު، ރައްޔިތުންގެ ސަލާމަތަށް ނުރައްކާ ވާނެ އެއްވެސް ކަމަކަށް ޖާގަ ދޭނެ ސަރުކާރެއް ނޫން ކަމަށެވެ.

އެ މަނިކުފާނު ވިދާޅުވީ ރައީސް މުއިއްޒުގެ ތަސައްވުރުގެ ތެރެއިން ޖުމުލަ ހައްލު ހޯދުމަށް މަސައްކަތް ކުރަމުން އަންނަ ބިދޭސީންގެ މައްސަލަ އާއި، މަސްތުވާ ތަކެތީގެ މައްސަލަ އާއި އަދި މިނޫން ވެސް ގާނޫނާ ގަވާއިދާ ހިލާފަށް ހިންގައި ކުށުގެ އަމަލުތައް ހުއްޓުވުމަށް ހޯމް މިނިސްޓަރު އަލީ އިހުސާންގެ ބެއްލެވުމުގެ ދަށުން ގިނަ މަސައްކަތް ތަކެއް ކުރަމުން އަންނަ ކަމަށެވެ.

އަދި މި މަސައްކަތްތައް މީގެ ކުރީން ނުހިނގާހާ ބާރު މިނުގައި، ކާމިޔާބު ކަމާއެކު ހިނގަމުން އަންނަ ކަމަށް ދިވެހި ރައްޔިތުން ހެކިވާނެ ކަމަށާއި މަދު ސިޔާސީ ބަޔަކު އިސްވެތިބެ، މިނިސްޓަރު އިހުސާންގެ އިތުބާރު ނެތް ކަމަށް ދެއްކުމަށް މަސައްކަތް ކުރަނީ ރައީސް މުއިއްޒުގެ ތަސައްވުރަށް ހުރަސް އަޅައި، ގައުމުގެ ހަމަޖެހުން ނަގާލުމަށް ކަމަށް ވެސް އެމަނިކުފާނު ވިދާޅުވި އެވެ.

"ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރަކީ ގާނޫނާ ހިލާފު، ރައްޔިތުންގެ ސަލާމަތަށް ނުރައްކާ ވާނެ އެއްވެސް ކަމަކަށް ޖާގަ ދޭނެ ސަރުކާރެއް ނޫން،" އެމަނިކުފާނު ވިދާޅުވި އެވެ.

އެމްޑީޕީގެ 11 މެންބަރުންގެ ސޮޔާއެކު، ހުށަހެޅި އެ މައްސަލައިގައި އިހުސާންގެ މައްޗަށް ކޮށްފައިވާ ތުހުމަތު ތަކަށް އެމަނިކުފާނު މިއަދު ވަނީ މަޖިލީހުގައި ޖަވާބު ދެއްވާފަ އެވެ.

މިއަދުގެ ޖަލްސާއަށް ހާޒިރުވި 75 މެންބަރުންގެ ތެރެއިން އިހުސާންގެ އިތުބާރު ނެތް ކަމަށް ވޯޓު ދެއްވީ އެމްޑީޕީގެ ޕާލިމަންޓްރީ ގްރޫޕުގެ 11 މެންބަރުންނެވެ. އިތުބާރު އޮތް ކަމަށް ވޯޓު ދެއްވީ 64 މެންބަރުންނެވެ.