އޭޕްރީލް 15 އިން ފަށައިގެން ދަތިކަމެއް ނެތި ހުރިހާ ބޭހެއް ލިބޭނެ: ރައީސް

މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ހުއްދަ ދޫކޮށްފައިވާ ލިސްޓުގައި ހިމެނޭ ހުރިހާ ބޭހެއް، މާޗު މަހުގެ 15 އިން ފަށައިގެން އެސްޓީއޯ ފާމަސީ ތަކުން އެއްވެސް ދަތި ކަމެއްނެތި ލިބޭނެ ކަމަށް ރައީސް ޑރ. މުޙައްމަދު މުއިއްޒު މިރޭ ވިދާޅުވެއްޖެ އެވެ.

ދ. މީދޫގައި ވާހަކަފުޅު ދައްކަވަމުން ރައީސް ވިދާޅުވީ އެމްއެފްޑީއޭގެ އެސެންޝަލް މެޑިސިން ލިސްޓުގައި ހިމެނޭ ހުރިހާ ބޭހެއް، މާޗު 15 އިން ފަށައިގެން, އަދި އެޕްރޫވްޑް މެޑިސިން ލިސްޓުގައި ހިމެނޭ ހުރިހާ ބޭހެއް އޭޕްރިލް 15 ވަނަ ދުވަހުން ފަށައިގެން އެސްޓީއޯ ގެ ބޭސް ފިހާރަތަކުން ލިބޭނޭ ކަމަށެވެ.

ރައީސްގެ ވާހަކަފުޅުގައި ވަނީ ފާމަސީ ތަކުން އެތައް ގުނައެއް އިތުރަށް ފައިދާ ޖައްސައިގެން ބޭހުގެ ވިޔަފާރި ކުރި ކުރުން ނިމުމަކަށް ގެނެސްފައިވާ ކަމަށް ވިދާޅުވެފަ އެވެ.

އޭގެ އިތުރުން މި ފަހަކަށް އައިސް ކުރިމަތިވި ބޭހުގެ ދަތި ކަމަކީ، ސީދާ މި ކަމުގެ ސަބަބުން ކުރިމަތި ކުރުވި ދަތިކަމެއް ކަމަށް އެ މަނިކުފާނު ވިދާޅުވި އެވެ.

"މި ސަރުކާރުން ޕްރައިޒް ކަޓްޑައުން ކޮށް، އެސްޓީއޯގެ ރޭޓަށް ތިރި ކުރީ. ތިރި ކުރީމަ މި ބޭސްތައް ގެންނަ ފަރާތް ތަކުން ދަތި ކުރަން ފެށީ. އެހެންވެގެން ބޭސް މަދުވީ. މި މައްސަލަ ދިމާވީ،" އެ މަނިކުފާނު ވިދާޅުވި އެވެ.

ސަރުކާރުން ބޭސް ލިބުން ދަތި ކުރީ ނޫންކަން ފާހަގަ ކުރައްވަމުން ރައީސް ވިދާޅުވީ ސަރުކާރުން ކުރިހާ ވެސް ކަމަކީ ގައުމުގެ ހެވާއި ލާބައަށް ރައްޔިތުންގެ ފައިސާއިން ކުރަމުން އައި އިސްރާފު ކުޑަ ކުރީ ކަމަށެވެ.

އަދި އެއްވެސް ފަރާތަކުން، ރައްޔިތުންނަށް ދަތި ކުރުމުގެ ފުރުސަތު މި ސަރުކާރުން ނުދޭނެ ކަމަށް ވެސް އެ މަނިކުފާނު ވިދާޅުވި އެވެ.