ދަތުރުދާ ރަށެއްގެ ގޮތުގައި އުއްދޫ ހަމަޖައްސައިފި

ރައީސް މީދޫއަށް ވަޑައިގަތުމުން ރަތްދޫލައިގެ މަރުހަބާއެއް ކިޔަނީ --

ދ. އަތޮޅުގެ ރައްޔިތުންނަށް ދަތުރު ގޮސް އުޅެވޭނެ ރަށެއްގެ ގޮތުގައި، އެ އަތޮޅު އުއްދޫ ކަނޑައަޅުއްވައި، މިރެއިން ފެށިގެން އެ ރަށް އާންމުން ދަތުރު ދިއުމަށް ހުޅުވައިލެވިފައިވާކަމުގައި، ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، ދ. މީދޫއަށް ވަޑައިގެން، އެ ރަށުގެ ރައްޔިތުންނާ މިރޭ ބައްދަލުކުރައްވައި، ވާހަކަފުޅު ދައްކަވަމުންނެވެ.

އުއްދޫއަކީ މީގެ ކުރިން އަމިއްލަ ފަރާތަކުން ވިޔަފާރީގެ އުސޫލުން ބޭނުން ކުރުމަށްފަހު، އެއްބަސްވުމުގެ މުއްދަތު ހަމަވުމުން ސަރުކާރަށް އަނބުރާ ލިބިފައިވާ ރަށެކެވެ.

އެ ރަށް މިހާރު ހަވާލުކޮށްފައި ވަނީ، ލޯކަލް ގަވަރުމެންޓް މިނިސްޓްރީއާ ކަމުގައި ރައީސުލްޖުމްހޫރިއްޔާ ވިދާޅުވި އެވެ.

ރަށް ބަލަހައްޓަނީ އެ މިނިސްޓްރީން ކަމަށާއި، އުއްދޫއަށް ދަތުރުގޮސް އުޅުމުގެ ކަންކަން ވެސް އެ މިނިސްޓްރީގެ ތެރެއިން ފަހިވެގެން ދާނެ ކަމުގައި އެ މަނިކުފާނު ވިދާޅުވި އެވެ.

އަދި މިކަމާ ގުޅުން ހުރި ތަފުސީލުތައް، އެ މިނިސްޓްރީން ކުރިއަށް އޮތް ދުވަސް ތަކުގައި އިއުލާންކުރާނެ ކަމަށް ވެސް އެ މަނިކުފާނު ވިދާޅުވި އެވެ.

ރައީސް ޑރ މުޢިއްޒު