ދޮގާއި އަބުރަށް އަރައިގަތުން ފަދަ މުންކަރާތްތަކުން ނަފުސު ތާހިރުކުރާން ރައީސްގެ އިލްތިމާސެއް

ދޮގު ހެދުމާއި، ގީބަ ބުނުމާއި، ނެތިމޮށުމާއި، މީހުންގެ އަބުރަށް އަރައިގަތުން ފަދަ ވިހަ އާދަތައް މި އިސްލާމީ މުޖުތަމައުގައި ފެތުރިފައިވާ ކަމަށާއި ކުރިއަށް އޮތް ރޯދަ މަހު، އަމިއްލަ ނަފުސުތައް މިކަމުން ތާހިރު ކުރުމަށް އަޒުމު ކަނޑައެޅުމާއެކު ހުރިހާ މަންސައެއްގައި ވެސް ދޫ ރައްކާތެރި ކުރުމަށް ރައީސް ޑރ. މުޙައްމަދު މުއިއްޒު އިލްތިމާސް ކުރައްވައިފި އެވެ.

އެ މަނިކުފާނު މިކަމަށް އިލްތިމާސް ކުރެއްވީ، ދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ކުޑަހުވަދޫގައި ވާހަކަފުޅު ދައްކަވަމުން، ރައްޔިތުންނަށް ޓަކައި ކުރަމުން އަންނަ މަސައްކަތްތަކާ ގުޅުވައިގެން ބައެއް ފަރާތް ތަކުން ފަތުރާ ދޮގު ވާހަކަ ތަކަށް އިޝާރާތް ކުރައްވަމުންނެވެ.

މިރޭގެ ޖަލްސާގައި އެ މަނިކުފާނު ވަނީ ދޮގު ހަބަރު ފެތުރުމުގެ ނުބައިކަމާއި، ދޮގު ހަބަރު ރައްދު ވެއްޖެ މީހާގެ އަމަލުތައް ބަހައްޓަންވީ ގޮތާމެދު، ކީރިތި ގުރުއާނާއި ހަދީސްފުޅުން ހެކި ދައްކަވައި ވާހަކަފުޅު ދައްކަވާފަ އެވެ.

މީހަކު ދައްކާހާ ވާހަކައެއް ބަލައިލުމެއް ނެތި ގާބޫލު ކުރުމާމެދު އިސްލާމް ދީން އަންގަވާ ގޮތަށް އިޝާރާތް ކުރައްވަމުން އެ މަނިކުފާނު ވިދާޅުވީ، ތިމާ ވާން ޖެހޭނީ ތިމާއަށް އިވޭ ވާހަކަތައް ކަނުލައި އަޑުއަހައި، އެ ކަމުގެ ތެދު ދޮގު ބަލާ މީހަކަށް ކަމުގަ އެވެ.

ސަރުކާރުން ރައްޔިތުންނަށް މަސްދަޅު ކޭސް ބަހަން ފެއްޓެވުމާ ގުޅިގެން ފަތުރާ އަޑުތަކަށް އިޝާރަތް ކުރައްވައި އެ މަނިކުފާނު ވަނީ، ކުރީ އަހަރެކޭ އެއްގޮތަށް މިއަހަރު ވެސް، ކަރަންޓުބިލާއި ފެންބިލުން ރަމަޟާންމަހު ޑިސްކައުންޓް ދެއްވާނޭ ކަމުގެ ޔަގީންކަން ދެއްވާފަ އެވެ.

މުސްލިމުން އުޅެންވާގޮތް، ކީރިތި ގުރުއާނާއި ސުންނަތުން ސާބިތުވާކަން ހަނދާންކޮށްދެއްވަމުން އެ މަނިކުފާނު ވަނީ، ދޮގުހެދުމާއި، ގީބަ ބުނުމާއި، ނެތިމޮށުމާއި، މީހުންގެ އަބުރަށް އަރައި ގަތުން ފަދަ ވިހަ އާދަތައް މި އިސްލާމީ މުޖުތަމައުގައި ފެތުރިފައިވާކަން ފާހަގަ ކުރައްވާފަ އެވެ.

ގައުމީ ތަރައްގީއަކީ، ފިކުރީ ތަރައްގީ އާއި ހިތާއި ސިކުނޑީގެ އަދި ނަފުސުގެ ތަރައްގީ ކަމުގައި، އެ މަނިކުފާނު ވިދާޅުވާ ވިދާޅުވުން، މިރޭގެ ޖަލްސާގައިވެސް ވަނީ ތަކުރާރު ކުރައްވާފަ އެވެ.