ރައްޔިތުންގެ މަޖިލީހުގެ ޗީފް އޮފް ބިއުރޯގެ މަގާމަށް, ޕީޕީއެމްގެ ޕާލަމެންޓްރީ ގުރޫޕުގެ ލީޑަރުކަން ކުރިން ކުރެއްވި އަޙްމަދު ނިހާން އައްޔަން ކުރައްވައިފިއެވެ

ރައްޔިތުންގެ މަޖިލީހުގެ އިދާރާ އިން ބުނީ އެ އިދާރާގެ ބިއުރޯ ޗީފަކަށް ރައްޔިތުންގެ މަޖިލީހުގެ ކުރީގެ މެންބަރު އަހުމަދު ނިހާން ހުސައިން މަނިކު ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުالله ވަނީ އައްޔަނުކުރައްވާފައިވާ ކަމަށެވެ.

މަޖިލީހުން ބުނީ ނިހާން އިއްޔެ ވަޒީފާއަށް ނިކުންނަވަން ވެސް ފައްޓަވާފައިވާ ކަމަށެވެ.

ނިހާން އައްޔަނުކުރައްވާފައިވަނީ ޕާލަމެންޓަރީ ސަރވިސް ގަވާއިދުގެ ދަށުން މަޖިލީހުގެ ރައީސްގެ މަސައްކަތްޕުޅަށް އެހީތެރިވުމުގެ ގޮތުންނެވެ.

ނިހާންގެ ކުރިން ބިއުރޯ ޗީފަކަށް ހުންނެވީ ފާތިމަތު މުޙައްމަދު ސޯލިހްއެވެ.

ނިހާން ވަނީ ދެ ދައުރެއްގައި ވިލިމާލެ ދާއިރާގެ މެންބަރުކަން ކުރައްވައިފައެވެ. ރައީސް އަބްދުﷲ ޔާމީންގެ ވެރިކަމުގައި ޕީޕީއެމްގެ ޕާލަމެންޓްރީ ގުރޫޕުގެ ލީޑަރަކަށް ހުންނެވީ ނިހާނެވެ. ފަހުން 19 ވަނަ މަޖިލީހަށް ނިހާން ވާދަ ކުރެއްވީ އޭނާގެ އުފަންރަށް ގދ. ތިނަދޫގެ ދާއިރާއަކަށެވެ. އެ އިންތިޚާބުން އޭނާއަށްވީ ނާކާމިޔާބީއެވެ.

ރައްޔިތުންގެ މަޖިލީހަށް އިންތިޚާބު ނުވުމާއެކު ދެން ނިހާން ފެނިގެން ދިޔައީ ޖުމްހޫރީ ޕާޓީއާ ގުޅިވަޑައިގެން އެ ޕާޓީގެ ލީޑަރު ގާސިމް އިބްރާހީމާ ވަރަށް އަރިސްކޮށް މަސައްކަތް ކުރެއްވިތަނެވެ.