ކުޅުދުއްފުށީ ސިހުރު އޮޕަރޭޝަން: 10 ގެއެއް ފާސްކޮށް ސިހުރު ހަދާ ސާމާނު ހޯދައިފި

ކުޅުދުއްފުށީ ސިޓީގައި ސިހުރުގެ މައްސަލަ ބޮޑުވެގެން، ފުލުހުން ހިންގި އޮޕަރޭޝަންގައި ގެތަކެއް ބަލައި ފާސްކޮށް ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފި އެވެ.

ފުލުހުން މީޑިއާތަކާ ހިއްސާކުރި މެސެޖުގައި ބުނެފައިވަނީ ކުޅުދުއްފުށީ ސިޓީ ޕޮލިހުން މިއަދު ކުރިއަށް ގެންދިޔަ ސިހުރު އޮޕްރޭޝަންގައި ކޯޓު އަމުރެއްގެ ދަށުން 10 ގެއެއް ބަލައި ފާސްކޮށްފައިވާ ކަމަށެވެ.

މީގެ ތެރެއިން އަށް ގެއަކުން ސިހުރު ހާހޫރަ ހަދަން ބޭނުން ކުރާ ޒާތުގެ ލިޔެކިއުމާއި، ފޮތާ އަދި ސިހުރު ހަދަން ބޭނުން ކުރާ އެކި ކަހަލަ އާލާތްތައް ފެނިފައިވާ ކަމަށް ފުލުހުން ބުންޏެވެ.

މި ގެތަކުން ނެގި ތަކެތި ފުލުހުންގެ ބެލުމުގެ ދަށަށް ގެނެސް، މި މައްސަލަ ތަހުގީގު ކުރަމުން އަންނަ ކަމަށް ވެސް އެ އިދާރާއިން ބުނެފައިވެ އެވެ.

ކުޅުދުއްފުއްޓަކީ މީގެ އެތައް އަހަރެއް ކުރިން ފަށައިގެން ވެސް ސިހުރުގެ މައްސަލަތައް ދޭތެރެދޭތެރެއިން ފަޅާއަރާ ރަށެކެވެ.

އެގޮތުން 2018 ވަނަ އަހަރު ރައީސް ޔާމީންގެ ވެރިކަން ވައްޓާލައި އިދިކޮޅު އެމްޑީޕީއަށް ވެރިކަން ހޯދައިދޭން ސިހުރު ހަދާ ކަމުގެ ތުހުމަތުގައި ވެސް ކުޅުދުއްފުށިން ބަޔަކު ހައްޔަރުކުރި އެވެ.

އަދި އެކަމުގައި އެފަހަރު ކުޅުދުއްފުށީ ކައުންސިލްގެ އިސް ދެ މުވައްޒަފަކު ވެސް ބައިވެރިވެފައިވާތީ ހައްޔަރު ކުރި އެވެ.