ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މި އަހަރުގެ އެޕްރެންޓިޝިޕް ޕްރޮގްރާމް އިއުލާނުކޮށްފިއެވެ.

މިއީ އެޗްޑީސީގެ ހަތް ވަނަ ޕްރޮގްރާމެވެ. ހަ މަސްދުވަހުގެ މުއްދަތަށް ކުރިއަށް ގެންދާ މި ޕްރޮގްރާމްގެ ބައިވެރިންނަށް އެލަވަންސެއްގެ ގޮތުން ކޮންމެ މަހަކު 6000ރ. ދޭނެއެެވެ.

މި ޕްރޮގްރާމްގެ ދަށުން ހިންގާ ތަމްރީން ޕްރޮގްރާމްތައް ހިންގާނީ މޯލްޑިވްސް ނެޝަނަލް ސްކިލްސް ޑިވެލޮޕްމެންޓް އޮތޯރިޓީގެ "ނެޝަނަލް ކޮމްޕިޓެންސީ ސްޓެންޑަރޑްސް" ތަކާ އެއްގޮތަށެވެ. އަދި ޕްރޮގްރާމް ފުރިހަމަ ކުރާ ފަރާތްތަކަށް މޯލްޑިވްސް ކޮލިފިކޭޝަން އޮތޯރިޓީ ގަބޫލުކުރާ ނެޝަނަލް ލެވެލް 3 ގެ ސަނަދެއް ހާސިލްކުރުމާއެކު، މަސައްކަތުގެ ތަޖުރިބާ ލިބޭނެއެވެ.

މި ޕްރޮގްރާމްގެ ދަށުން ހަތް ދާއިރާއަކުން ބައިވެރިން ތަމްރީން ކުރުމަށް ހަމަޖެހިފައިވެއެވެ.

އެއީ ކޮމްޕިއުޓާ ހާޑްވެއ ާއެންޑް ނެޓްވޯކިންގް، ހެލްތް އެންޑް ސޭފްޓީ ކޮންސްޓްރަކްޝަން، ފްރަންޓް އޮފީސް، ގާޑަނިން، ކޮންސްޓްރަކްޝަން ސައިޓް ސްޕަވައިޒަރު، މޭސަނަރީ އަދި އިލެކްޓްރިކަލް އިންސްޓޮލޭޝަންއެވެ.

މި ޕްރޮގްރާމަށް އޮންލައިންކޮށް ކުރިމަތިލުމަށް ހުޅުވާލާފައިވާއިރު 20 ޖޫންގެ 15:30 ގެ ކުރިން ކުރިމަތިލާން ޖެހެއެވެ.

އެ ކުންފުނިން ބުނީ ކުންފުނީގެ އެޕްރެންޓެޝިޕް ޕްރޮގްރާމުގެ މަގްސަދަކީ ކަނޑައެޅިފައިވާ ދާއިރާތަކުން ފަންނީ އަދި ގާބިލް މީހުން ބިނާކުރުން ކަމަށެވެ. އަދި ކުރިއަށްދާނެ ވަކި ދާއިރާއެއް ކަނޑަނޭޅި ތިބި ބައިވެރިންނަށް ފުރުސަތުތަކެއް ހުޅުވާލައި ނެޝެނަލް ލެވެލްގެ ސެޓްފިކެޓެއް ހޯދައި މަސައްކަތުގެ މާހައުލުގައި ބިނާ ކުރުވަނިވި ހުނަރުވެރި ޒުވާނުންތަކެއް އުފައްދާ ވަޒީފާގެ މައިދާނަށް ނުކުތުމުގައި އެހީތެރިވެދިނުމަކީ އެ ކުންފުނީގެ މަގްސަދު ކަމަށް ބުނެފައިވެއެވެ.

މިޕްރޮގްރާމް ނިމިގެންދާއިރު އެންމެ ރަނގަޅު ފަރާތްތަކަށް އެ ކޯޕަރޭޝަނުގައި ވަޒީފާގެ ފުރުސަތުތައް ހުރި މިންވަރަކުން ވަޒީފާ ހަމަޖައްސައި ދިނުމަށް ވަނީ ނިންމައިފައެވެ.