"އަހާ" ގެ ހަތަރު ވަނަ ސިލްސިލާ ފޯރަމް މިރޭ

ވަޒީރުންނާ ސުވާލު ކުރުމަށް ފުރުސަތު ހުޅުވާލައިގެން "އަހާ"ގެ ނަމުގައި ބާއްވާ އާންމު ފޯރަމް ތަކުގެ ސިލްސިލާ ފޯރަމެއް ޕަބްލިކް ސާވިސް މީޑިޔާގެ ސްޓޫޑިއޯގައި މިރޭ އޮންނާނެ އެވެ.

މިއީ ރައީސުލްޖުމްހޫރިއްޔާގެ އޮފީހާއި ޕަބްލިކްސާވިސް މީޑިޔާ (ޕީއެސްއެމް) ގުޅިގެން ބާއްވާ ފޯރަމެކެވެ.

މިރޭ ބާއްވާ ފޯރަމުގައި ރައްޔިތުންނަށް މައުލޫމާތު ދެއްވުމަށާއި ސުވާލު ތަކަށް ޖަވާބު ދެއްވުމަށް ތިއްބަވާނީ، އިޖްތިމާއީ އަދި އާއިލީ ތަރައްގީއާ ބެހޭ ވަޒީރު، ޑރ. އައިޝަތު ޝިހާމް، މަތީ ތައުލީމާ މަސައްކަތްތެރި ކަމާއި ހުނަރުތައް ތަރައްގީ ކުރުމާ ބެހޭ ވުޒާރާގެ ވަޒީރު، ޑރ. އަލީ ހައިދަރު އަހުމަދު، އިސްލާމީ ކަންތައްތަކާ ބެހޭ ވުޒާރާގެ ވަޒީރު، ޑރ. މުޙައްމަދު ޝަހީމް އަލީ ސައީދު، އިގުތިސާދީ ތަރައްގީއާ ބެހޭ ވިޔަފާރިއާ ބެހޭ ވުޒާރާގެ ވަޒީރު، މުޙައްމަދު ސައީދު، އަދި ފަތުރުވެރިކަމާ ތިމާވެއްޓާ ބެހޭ ވުޒާރާގެ ވަޒީރު، ތޯރިގު އިބްރާހިމް އެވެ.

މިފޯރަމްގައި ސަރުކާރުން ކުރިއަށް ގެންދާ މަސައްކަތްތަކާ ބެހޭ މައުލޫމާތު ވަޒީރުންގެ ފަރާތުން ރައްޔިތުންނަށް ދެއްވައި، ރައްޔިތުންގެ ސުވާލު ތަކަށް ސީދާ ވަޒީރުން ޖަވާބު ދެއްވުމަށް ފުރުސަތު ހުޅުވާލާނެ އެވެ.

މިކަމަކީ ސަރުކާރުން ރައްޔިތުންނާ ވީހާވެސް ގާތުން މަސައްކަތް ކުރުމުށާއި، ވީހާވެސް ހާމަކަން ބޮޑު ގޮތެއްގައި ސަރުކާރުގެ މަސައްކަތްތައް ކުރިއަށް ގެންދިއުމަށް ބާރު އެޅުމުގެ ގޮތުން ކުރާ މަސައްކަތެކެވެ.

މި ފޯރަމަކީ އާންމުންނަށް އެ ތަނަށް އައިސް ބައިވެރިވެވޭ ގޮތަށް އަދި ފޯރަމް ހިނގަމުންދާ ވަގުތު ސޯޝަލް މީޑިޔާގެ ވަސީލަތްތައް މެދުވެރިކޮށް ވެސް ބައިވެރިވެވޭ ގޮތަށް ހުޅުވާލެވިގެން ކުރިއަށް ގެންދާ ފޯރަމެކެވެ.

މި ފޯރަމް މިރޭ އޮންނާނީ 9:00 ޖަހާއިރު ޕީއެސްއެމްގަ އެވެ.