ސަލްޓަން ޕާކު މަރާމާތު ކުރުމަށް ބީލަމަށް ހުޅުވައިލައިފި

ސަލްޓަން ކާޕު މަރާމާތު ކުރުމަށް ބީލަން ހުށަހަޅަން ހުޅުވައިލައިފި އެވެ.

ބީލަން ހުށަހެޅުމުގެ ސުންގަޑިއަކީ މި މަހުގެ 24 ވާ ހޯމަ ދުވަހެވެ.

މައުލޫމާތު ސެޝަން އޮންނާނީ އަންގާރަ ދުވަހުގެ ހެނދުނު 9:00ގައި ހ.ހުޅުގަލި، އެއް ވަނަ ފަންގިފިލާގައި ހުންނަ ސިޓީ ކައުންސިލްގެ އިދާރާގެ މީޓިން ރޫމުގަ އެވެ.

ސިޓީ ކައުންސިލުން ބުނީ ގަޑިއަށް މައުލޫމާތު ސާފުކުރަން ހާޒިރު ނުވާ ފަރާތްތަކާއި ގަޑިޖެހުމުގެ ފަހުން އަންދާސީ ހިސާބު ހުށަހަޅަން ހާޒިރުވާ ފަރާތް ތަކުގެ އާންދާސީ ހިސާބު ބަލައި ނުގަންނާނެ ކަމަށެވެ.

ސަލްޓަން ޕާކު މަރާމާތު ކޮށްދޭނެ ބަޔަކު ހޯދަން ސިޓީ ކައުންސިލުން އިއުލާން ކުރިއިރު، ރައީސް ޑރ. މުޙައްމަދު މުއިއްޒު އިއްޔެ ކުރެއްވި އެކްސް ޕޯސްޓެއްގައި ވިދާޅުވީ ސަލްޓަން ޕާކުގެ ހަލަތު ފެނިފައި ހިތާމަ ކުރައްވާ ކަމަށެވެ. އަދި މިއަދު އެ ދެތަން ވެސް ދަނީ ވީރާނާ ވަމުން ކަމަށް ވިދާޅުވި އެވެ.

އެ މަނިކުފާނު ވިދާޅުވީ މި ދެ ތަނަކީ ވެސް ތޮށްޖެހިފައިވާ މާލޭގައި، ރައްޔިތުންނަށް ނުހަނު ހިތްހަމަޖެހުމާއި އުފާ ލިއްބައިދޭ ދެ ތަން ކަމަށެވެ.

ރައީސް ވިދާޅުވީ މި ދެތަނުގެ ރީތި ކަމާއި އާރޯކަން އަނބުރާ ގެނެސްދީ އަދި ކުރިޔަށްވުރެ ވެސް ފުރިހަމަކޮށްދިނުމަށް ސަރުކާރުން ހާއްސަ މަސައްކަތް ތަކެއް ކުރާނެ ކަން މާލޭގެ ރައްޔިތުންނާއި މާލޭގައި ދިރިއުޅޭ އެންމެހާ ރައްޔިތުންނަށް މައުލޫމާތަށް ޓަކައި ދަންނަވާ ކަމަށެވެ.

ސިޓީ ކައުންސިލުން ބުނެފައި ވަނީ ސަލްޓަން ޕާކު ހުޅުވުނު ފަހުން އެ ތަނަކީ އެއްވެސް މަރާމާތެއް ނުކުރެވި، އެ ތަނުގައި ހުރި އިމާރާތް ތަކާއި ވަސީލަތްތައް ބޭނުން ނުކުރެވޭ ހާލަތަކަށް ގޮސްފައިވާ ތަނެއް ކަމަށެވެ.