މާލޭ ޓެކްސީ ލައިން: ދަތިކަމެއް ނެތި 24ގަޑިއިރު ޓެކްސީ ހިދުމަތް

ސަރުކާރުގެ ޓެކްސީ ލައިން ފެށުމުން، މިހާރުވެސް ހިދުމަތް ދެމުން އަންނަ އަމިއްލަ ޓެކްސީ ސެންޓަރު ތަކުގެ ޓެކްސީތަކާއި "ރައްޔިތުންގެ ޓެކްސީ" އާއި ގުޅިގެން މާލޭ ސަރަހައްދަށް އެއްވެސް ދަތިކަމެއް ނެތި 24 ގަޑިއިރު ޓެކްސީ ހިދުމަތް ފޯރުކޮށްދެވޭނެ ކަމަށް އެމްޓީސީސީ އިން ބުނެފި އެވެ.

ޓެކްސީ ހިދުމަތުން އިތުރު ވަޒީފާތަކެއް އުފެދޭނެ ކަމަށާއި އެގޮތުން ޑްރައިވަރުން، މެކޭނިކުން އަދި އޮޕަރޭޝަނަލް ފީލްޑް ތަކުގައި ވެސް ވަޒީފާ އަދާ ކުރުމުގެ ފުރުސަތު ހުޅުވައިލާނެ ކަމަށް އެމްޓީސީސީން ބުންޏެވެ. އަދި ޕާޓްޓައިމްކޮށް ވަޒީފާ އަދާ ކުރެވޭނެ "ޑްރައިވާ ޕޫލް" އެއްވެސް މި ހިދުމަތާއެކު އެކުލަވާލަން ގަންދުކުރާ ކަމަށް ވެސް ބުންޏެވެ.

"މިކަމުގެ ސަބަބުން ދުވާލުގަޑީގައި ވަޒީފާ އަދާކޮށްފަ، ރޭގަނޑު ޓެކްސީއެއް ދުއްވައިގެން އިތުރު އާމްދަނީއެއް ހޯދުމުގެ ފުރުސަތު ފަހިވެގެން ދާނެ، އަދި އަތޮޅުތަކުން ރައްޔިތުން އެކިއެކި ބޭނުން ތަކަށް މާލެ އައިސްގެން އުޅޭއިރު ވެސް މި ޓެކްސީ ލައިންގައި ވަޒީފާ އަދާ ކުރެވޭނެ، މިގޮތުން ކާރު ދުއްވުމުގެ ލައިސެންސް އޮތް ހަމަ ކޮންމެ ބޭފުޅަކަށް ވެސް "މާލޭ ޓެކްސީ ލައިން"ގެ ޚިދުމަތަށް ގުޅުމުގައި އެއްވެސް ހުރަހެއް ނޯންނާ،" އެ ކުންފުނިން ބުންޏެވެ.

އެމްޓީސީސީން ބުނީ މ ހިދުމަތުގެ ފެންވަރު ރަނގަޅު ކުރުމަށް ޓަކައި ކަސްޓަމަރުންގެ ޝަކުވާ ތަކާއި ހިޔާލުތައް އެ ކުންފުނީގެ "ހޮޓްލައިން" 1650 މެދިވެރިކޮށް ރެކޯޑްކޮށް، ހިދުމަތް ރަނގަޅު ކުރުމަށް ބޭނުންވާ ފިޔަވަޅުތައް އަޅަމުން ގެންދާނެ ކަމަށެވެ.

"އެމްޓީސީސީގެ އަމާޒަކީ ރައްޔިތުންނަށް އިތުބާރުހިފޭ ބަރޯސާ ވެވޭނެ ފަދަ ލުއިފަސޭހަ ޓެކްސީ ހިދުމަތެއް ފޯރުކޮށްދިނުން،" އެ ކުންފުނިން ބުންޏެވެ.

މާލޭ ޓެކްސީ ލައިން" ގެ މަސައްކަތް ކުރިއަށް ގެންދާނީ ފިޔަވަހި ތަކަކަށް ބަހާލައިގެންނެވެ. މިގޮތުން، ފުރަތަމަ ފިޔަވަހީގެ ދަށުން، މާލެ، ހުޅުމާލެ އަދި ވީއައިއޭ ގައި މި ހިދުމަތް ފަށާގޮތަށް ނިންމާފައި ވަނީ މި އަހަރު އެވެ.

މާލޭ ސަރަހައްދުގައި ޓެކްސީ ލައިން ހިދުމަތް ދޭން ފެށުމަށް އެމްޓީސީސީއާއެކު ޓްރާންސްޕޯޓް މިނިސްޓްރީން އިއްޔެ ވަނީ އެއްބަސްވުމެއް ހަދާފަ އެވެ. އެވެ.

އެ އެއްބަސްވުމުގައި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައުދީ އެވެ. އަދި ޓްރާންސްޕޯޓް މިނިސްޓްރީގެ ފަރާތުން ސޮއި ކުރެއްވީ ޑިރެކްޓަ ޖެނެރަލް އަހުމަދު ޝަމީމެވެ.