ބައިއިލެކްޝަނަށް ހާއްސަ އަހަމިއްޔަތުކަމެއް ދެއްވީތީ، ރައީސަށް އާތިފާގެ ޝުކުރު

ނ. ލަންދޫ ކައުންސިލްގެ އަންހެން މެންބަރު އިންތިހާބު ކުރުމުގެ ބައިއިލެކްޝަނަށް ހާއްސަ އަހަމިއްޔަތުކަމެއް ދެއްވީތީ، އެ ގޮނޑި ކާމިޔާބު ކުރެއްވި ޕީޕަލްސް ނޭޝަނަލް ކޮންގްރެސްގެ ކެންޑިޑޭޓު އާތިފާ މޫސާ، ރައީސުލްހުމްހޫރިއްޔާ ޑރ. މުޙައްމަދު މުއިއްޒަށް ހުއްޓުމެއް ނެތް ޝުކުރު އަދާ ކުރައްވައިފި އެވެ.

އެމްޑީޕީގެ މައްޗަށް ކުރި ހޯދައި ލަންދޫ ކައުންސިލްގެ ގޮނޑި ވެރިކަން ކުރާ ޕީއެންސީއަށް ކާމިޔާބު ވުމުގެ އުފަލުގައި"ދެލި"އާ ވާހަކަ ދައްކަވަމުން އާތިފާ ވަނީ އެންމެ ބޭނުންވި ވަގުތުގައި އޭނާއަށް އެހީތެރިވެދިން ފަރާތް ތަކުގެ މަތީން ހަނދާން އައު ކޮށް، އެ ފަރާތް ތަކަށް ޝުކުރުވެރިވެފަ އެވެ.

އާތިފާ ބުނުއްވީ މި އިންތިހާބު ޕީއެންސީއަށާއި އޭނާއަށް ކާމިޔާބުކޮށްދިނުމަށް ރެއާއި ދުވާލު އެކި ގޮތް ގޮތުން މަސައްކަތްކޮށް އެހީތެރިވެދިން، އެންމެހާ ފަރާތް ތަކަށް އިހުލާސްތެރި ކަމާއެކު ހިތުގެ އެންމެ ފުނުން ޝުކުރު އަދާކުރައްވާ ކަމަށެވެ.

އިލެކްޝަންގެ ކަންކަން ވަރަށް ކައިރިން ބައްލަވަމުން ގެންދެވި ކަމަށް ޓަކައި އާތިފާ ވަނީ ރައީސް މުއިއްޒަށް ވަކީން ހާއްސަ ޝުކުރެއް އަދާ ކުރައްވާފަ އެވެ.

"ހާއްސަކޮށް ރައީސް ޑރ. މުއިއްޒު މި އިންތިހާބަށް ދެއްވި ހާއްސަ އަހަމިއްޔަތު ކަމަށް ޓަކައި ހުއްޓުމެއް ނެތް ޝުކުރު އެ މަނިކުފާނަށް ދަންނަވަން،" އޭނާ ބުނުއްވި އެވެ.

އެ ބޭބޭފުޅުންގެ އިތުރުން މަނަދޫ ދާއިރާގެ މަޖިލީސް މެންބަރު ހުސްނީ މުބާރަކު އަށާއި ލަންދޫ ޕީއެންސީގެ ސްޓެއަރިން ކޮމެޓީގެ މެންބަރުންނަށާއި ލަންދޫ ޕީއެންސީގެ މެންބަރުންގެ އިތުރުން ތާއީދުކޮށް ވޯޓު ދިން އެ ރަށު ރައްޔިތުންނަށް ވެސް އާތިފާ ވަނީ ހައްގު ޝުކުރު އަދާ ކުރައްވާފަ އެވެ.

ދެކެމުން އައި ހުވަފެނުގައި ދާދި އަވަހަށް ކުލަ ޖެހި، މި ގޮނޑި ކާމިޔާބު ކުރެވުނީތީ އާތިފާ ހުންނެވީ ވަރަށް އުފަލުންނެވެ.

އެހެންވެ، އޭނާ ފުރަތަމަ ވެސް ދެއްވީ އިހުލާސްތެރިކަމާއެކު ރަށަށް ހިދުމަތް ކުރައްވާނެ ކަމުގެ ޔަގީންކެމެވެ.

"ލަންދޫގެ ތަރައްގީއަށް އާނއެކޭ ބުނެ، އަޅުގަނޑަށް ދެއްވި ވޯޓުގެ އަގު ގާނޫނާއި ގަވާއިދާ ފުށު ނާރާ ކޮންމެ ކަމެއްގައި ދޭނެ ކަމުގެ ޔަގީންކަން ދެން،" އޭނާ ބުނުއްވި އެވެ.

ފެބްރުއަރީ އަށް ވަނަ ދުވަހު ކުރިޔަށް ގެންދިޔަ ބައިއިލެކްޝަންގައި ލަންދޫ ކައުންސިލްގެ ގޮނޑި ކާމިޔާބު ކުރެއްވި އާތިފާއަށް ލިބުނީ 326 ވޯޓެވެ. އެމްޑީޕީގެ ކެންޑިޑޭޓް ފާތިމަތު ރިޔާޝާއަށް 289 ވޯޓެވެ.