މިމަހުގެ 20ގެ ކުރިން ރޯދަ އިނާޔަތް ދޭން ފިނޭންސުން އަންގައިފި

ސިވިލް ސާވިސް މުވައްޒަފުންތަކެއް -- މިހާރު ފޮޓޯ

މި އަހަރުގެ ރޯދަ މަހުގެ އިނާޔަތުގެ ފައިސާ މި މަހުގެ 20 ވަނަ ދުވަހުގެ ކުރީން ސަރުކާރުގައި މަސައްކަތް ކުރާ މުވައްޒަފުންނަށް ދިނުމަށް ފިނޭންސް މިނިސްޓްރީން ދައުލަތުގެ ހުރިހާ އޮފީސް ތަކަށް އަންގައިފި އެވެ.

ފިނޭންސް މިނިސްޓްރީން މިއަދު ނެރުނު ބަޔާނުގައި ވަނީ މި އަހަރު ވެސް ރޯދަ އެލަވެންސްގެ ގޮތުގައި ވަޒީފާ އަދާ ކުރާ ކޮންމެ މުސްލިމް މުވައްޒަފަކަށް 3،000 ރުފިޔާ ދޭން ޖެހޭނެކަން ހަނދާންކޮށްދީފަ އެވެ.

މުސާރަ ލިބޭ ގޮތަށް އެއް ވަޒީފާއަށް ވުރެ، ގިނައިން ވަޒީފާ އަދާ ކުރާ މުވައްޒަފަކަށް އިނާޔަތް ދޭނީ އަސާސީ ވަޒީފާ އަދާ ކުރާ ތަނުން އެކަނި ކަމަށް ވެސް ފިނޭންސުން ބުނެފައިވެ އެވެ.

މީގެ އިތުރުން ރޯދަ މަސް ފެށޭއިރު، 'ޕޭ ލީވް' "ސްކޮލާޝިޕް" މުވައްޒަފުންނާއި 'ނޯޕޭ ލީވް'ގައި ތިބޭ މުވައްޒަފުންނަށް ރޯދަ އެލަވެންސް ދޭން ނުޖެހޭނެ ކަމަށް ވެސް އަންގާފައިވެ އެވެ.

އެކަމަކު ލީވްގައި ހުރި މުވައްޒަފަކު ރޯދަ މަހު ވަޒީފާއަށް ނުކުންނަށް ފަށައިފި ނަމަ، އެ ދުވަހަކުން ފެށިގެން ރޯދަ މަސް ނިމެންދެން ޖެހޭ އަދަދު ބަލައި އެލަވެންސްގެ ގޮތުގައި ދޭން ޖެހޭނެ އެވެ.

ވަޒީފާއާ ބެހޭ ގާނޫނުގައި ބުނަނީ ރާއްޖޭގައި ވަޒީފާ އަދާކުރާ މުސްލިމް ކޮންމެ މީހަކަށް ވެސް 3،000 ރުފިޔާ، ރޯދަ އެލަވަންސްގެ ގޮތުގައި ދޭން ޖެހޭނެ ކަމަށެވެ.

މީލާދީ ކަލަންޑަރުގައިވާ ގޮތުން މި އަހަރުގެ ރޯދަ މަސް ފެށެނީ މާޗު މަހުގެ އެއްވަނަ ދުވަހު އެވެ.

ފިނޭންސް މިނިސްޓްރީ