ހެލްމެޓް އެޅުން ލާޒިމް ނުކުރާ ތަންތަނުގައި ހެލްމެޓް އަޅައިގެން ދުއްވާ ނަމަ ހުއްޓުވާނެ

ހެލްމެޓް އެޅުން ލާޒިމު ނޫން ތަންތަނުގައި ހެލްމެޓް އަޅައިގެން ދުއްވާ މީހުން ހުއްޓުވާނެ ކަމަށް ފުލުހުން ބުނެފި އެވެ.

ފުލުހުން މިރޭ ނެރުނު ބަޔާނުގައި ބުނަނީ ހެލްމެޓް އެޅުން ގާނޫނު ތަކުން ލާޒިމްކޮށްފައި ނުވާ ސަރަހައްދު ތަކުގައި ކާކުކަން ވަންހަނާކޮށް ކުށްކުށަށް އަރައިގަތުމުގެ ނިޔަތުގައި ހެލްމެޓް އަޅައިގެން ބައެއް މީހުން އުޅޭ ކަމާއި ހިދުމަތްދޭ ތަންތަނަށާއި ފިޔަފާރި ކުރާ ތަންތަނަށް ވަދެ، ހަދާކަން އަނެއްކާ ވެސް ފާހަގަ ކުރެވިފައި ކަމަށެވެ.

މީގެ އިތުރުން ގަވާއިދުގައި A1 އަދި A0 ގިންތީގެ އުޅަނދު ދުއްވާ އިރު، އުޅަނދު ދުއްވަން އިންނަ މީހާ އާއި އުޅަނދުގެ ފަހަތުގައި އިންނަ މީހާ ހެލްމެޓް އެޅުން ލާޒިމުކޮށްފައި ވަނީ 30 ކިލޯމީޓަރަށްވުރެ، ބާރަށް އެއްގަމު އުޅަނދު ދުއްވަން ހުއްދަ ކޮށްފައިވާ ސަރަހައްދު ތަކުގައި ކަމަށް ފުލުހުން ބުނެ އެވެ.

"ހެލްމެޓް އެޅުން ލާޒިމުކުރާ ސަރަހައްދުތައް ފިޔަވައި އެހެނިހެން ސަރަހައްދު ތަކުގައި ހެލްމެޓް އަޅައިގެން އެއްގަމު އުޅަނދު ދުއްވާ މީހުންނަށް ފާރަވެރިވެ، ތުހުމަތު ކުރެވޭ މީހުން ހުއްޓުވައި ބަލައި ފާސް ކުރަމުން ގެންދާނެ ވާހަކަ އެންމެހާ ފަރާތް ތަކުގެ ސަމާލުކަމަށް ޓަކައި ދަންނަވަން،" އެ ބަޔާނުގައިވެ އެވެ.

ފުލުހުން ބުނީ މިއީ އެންމެހާ ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް އަމާން ވެއްޓެއް ގާއިމު ކުރުމުގެ ގޮތުން އަޅައި ފިޔަވަޅެއް ކަމަށެވެ.

ހެލްމެޓް އަޅައި ކާކުކަން ނޭނގޭ ގޮތަށް މޫނު ނިވާކޮށްގެން ތަންތަނަށް ވަދެ، ފައިސާ ފޭރުމާއި މާރާމާރީތައް ހިންގުމުގެ މައްސަލަތައް ހާއްސަކޮށް މާލެ ސަރަހައްދުގައި ގިނަ އެވެ.

މިކަން ބޮޑުވެގެން 2023 ވަނަ އަހަރުގެ ކުރީކޮޅު ފުލުހުން ވަނީ ހެލްމެޓް އެޅުން ލާޒިމް ނޫން ތަންތަނުގައި ހެލްމެޓް އަޅައި މީހުން ހުއްޓުވައި ފާސް ކުރުމުގެ އޮޕަރޭޝަނެއް ވެސް ކުރިއަށް ގެންގޮސްފަ އެވެ.

ނަމަވެސް އެ އޮޕަރޭޝަނަށްފަހު ވެސް މި މައްސަލަ ދިޔައީ ދުވަހެއް ދުވަހަކަށް ބޮޑުވަމުންނެވެ.

ފަހުން ފަހުން އައިސް ފުލުހުން މިކަމާ އަޅައިނުލާކަން ވެސް ފާހަގަ ކުރެވެ އެވެ.