މީހަކަށް ކޯރާޑިއަކުން ހަމަލާ ދިން ދެ މީހަކު އަތުލައިގެންފި

ހުޅުމާލޭގައި ކޯރާޑީއަކުން މީހަކަށް ހަމަލާ ދިން ދެ މީހަކު އަތުލައިގެންފި އެވެ.

ފުލުހުން ބުނީ ހުޅުމާލޭ ބޯގަންވިލާ މަގުގެ ރެހެންދި ޓާފް ދަނޑުގެ ހުޅަނގު ފަޅީގައި މަޑުކޮށްގެން ހުރި މީހަކަށް ސައިކަލެއްގައި އައި ދެ މީހަކު ހަމަލާދީފައިވާ މައްސަލައެއް ރޭ 23:35 ހާއިރު ރިޕޯޓުކޮށްފައިވާ ކަމަށެވެ.

މި މައްސަލައާ ގުޅުވައިގެން ފުލުހުންގެ ބެލުމުގެ ދަށަށް ގެންގޮސްފައި ވަނީ ގދ، ފިއޯރީ، ހީނާމާގޭ، ރުސްތުމް އިބްރާހީމް، 25، އަދި ބ. ގޮއިދޫ، ފިނިފެންމާގެ، ސައިފްﷲ ފައިސަލް، 19، އެވެ.

މާރާމާރީގައި އަނިޔާވި މީހާ ހުޅުމާލޭ ހޮސްޕިޓަލުގައި ފަރުވާ ދިނުމަށް ފަހު މިހާރު ވަނީ ދޫކޮށްލާފައި ކަމަށް ފުލުހުން ބުންޏެވެ. އަދި މާރާމާރީގައި ހަމަލާ ދީނީ ކޯރާޑީއަކުން ކަމަށް ވެސް ބުންޏެވެ.

ފުލުހުން ބުނި ގޮތުގައި މާރާމާރީ ހިންގި ކަމަށް ތުހުމަތު ކުރެވޭ ދެ މީހުން އަތުލައިގަތީ ފިލައިގެން މާލެ ދަނިކޮށް ހައިވޭ މަތީންނެވެ.

އެ މީހާ ހުއްޓުވި ސަރަހައްދުން، މާރާމާރީ ހިންގަން ބޭނުންކުރި ކަމަށް ތުހުމަތު ކުރެވޭ ހަތިޔާރު، އަދި އަދި ވަޅިއެއްވެސް ފެނިފައިވާ ކަމަށް ފުލުހުން މައުލޫމާތު ދިނެއެވެ.

މި މައްސަލަނ ފުލުހުން އަންނަނީ ތަހުގީގު ކުރަމުންނެވެ.