ބައި-އިލެކްޝަން: ގޮނޑިތައް ކާމިޔާބުކުރި ޕީއެންސީގެ ކެންޑިޑޭޓުންނަށް ރައީސްގެ މަރުހަބާ

މިއަދުބޭއްވި ލޯކަލް ކައުންސިލްތަކުގެ ބައި އިލެކްޝަން އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ބައި އިލެކްޝަންގައި ވެރިކަން ކުރާ ޕީޕަލްސް ނެޝަނަލް ކޮންގްރެސް އިން ބޮޑު ކާމިޔާބީއެއް ހޯދާފައިވާއިރު، އެ ކެންޑިޑޭޓުންނަށް ރައީސް ޑރ. މުޙައްމަދު މުއިއްޒު މަރުހަބާ ވިދާޅުވެއްޖެ އެވެ.

ރައީސް މިރޭ ކުރެއްވި އެކްސް ޕޯސްޓެއްގައި ވިދާޅުވީ، ބައި-އިލެކްޝަން މިއަދު ބާއްވަން ކަނޑައެޅި 37 ގޮނޑީގެ ތެރެއިން އިންތިހާބަކާ ނުލައި 24 ގޮނޑި، އަދި އިންތިހާބުގައި ވާދަކޮށްގެން ނުވަ ގޮނޑިއާއެކު ޖުމުލަ 33 ގޮނޑި ޕީއެންސީއަށް ލިބުނު ވަރަށް ބޮޑު ކާމިޔާބީއެއް ކަމަށެވެ.

އެގޮތުން ބައި އިލެކްޝަންގައި އަތޮޅު ކައުންސިލް ރައީސްކަމުގެ އެއް ގޮނޑިއާއި ރަށު ކައުންސިލް ރައީސްކަމުގެ އެއް ގޮނޑިއާއި ރަށު ކައުންސިލް މެމްބަރުކަމުގެ ދެ ގޮނޑިއާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ 29 ގޮނޑި ޕީއެންސީން ވަނީ ކާމިޔާބުކޮށްފައިވާ ކަމަށް އެމަނިކުފާނު ވިދާޅުވި އެވެ.

"މި ކާމިޔާބީ ލިބުމުގެ އުފަލުގައި މާތްﷲ ހަޒުރަތަށް ހަމްދުކޮށް، އިންތިހާބު ކާމިޔާބު ކުރެއްވި ކެންޑިޑޭޓުންނަށް މަރުހަބާ ދަންނަވައި، އިންތިހާބު ކާމިޔާބުކުރުމަށް މަސައްކަތް ކޮށްދެއްވި ފަރާތްތަކަށާއި އަދި ވޯޓުގައި ބައިވެރިވެވަޑައިގަތް ލޮބުވެތި ރައްޔިތުންނަށް ޝުކުރު ދަންނަވަން،" ރައީސްގެ ޕޯސްޓުގައިވެއެވެ.

މިއަދުގެ ވޯޓުލުން ކުރިއަށް ގެންދިޔައީ ދެ ރަށެއްގެ ބައި އިލެކްޝްންއާއި 10 ރަށެއްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީ ތަކަށް މެންބަރުން ހޮވުމަށެވެ.

މި ބައިއިލެކްޝަންގެ ވަގުތީ ނަތީޖާ ދައްކާ ގޮތުން 12 ދާއިރާގެ ތެރެއިން ނުވަ ދާއިރާއެއްގެ ގޮނޑި ކާމިޔާބު ކުރީ ޕީއެންސީންނެވެ. އަދި އިދިކޮޅު އެމްޑީޕީން ދެ ގޮނޑި ނަގާފައިވާއިރު، އަނެއް ދެ ގޮނޑި ކާމިޔާބު ކުރީ އަމިއްލަ ގޮތުން ވާދަ ކުރި ކެންޑިޑޭޓުންނެވެ.