އައިޖީއެމްއެޗުގައި މީހަކު މަރުވި މައްސަލައެއް ފުލުހުން ބަލަން ފަށައިފި

އިންދިރާ ގާންދީ މެމޯރިއަލް ހޮސްޕިޓަލް، (އައިޖީއެމް)ގައި ފަރުވާދެމުން ދަނިކޮށް ނުކުޅެދުންތެރިކަން ހުންނަ މީހަކު މަރުވި މައްސަލައެއް ފުލުހުން ބަލަން ފަށައިފި އެވެ.

ފުލުހުން ބުނީ އައިޖީއެމްއެޗުގެ އީއާރުގައި ފަރުވާދެމުންދިޔަ ނުކުޅެދުންތެރިކަން ހުންނަ މީހަކު މަރުވި މައްސަލައެއް މި މަހުގެ ހަ ވަނަ ދުވަހުގެ ރޭ 11:30ހާއިރު ރިޕޯޓުކޮށްފައިވާ ކަމަށެވެ.

އެ މީހާ އައިޖީއެމްއެޗަށް ފަރުވާދިނުމަށް ޓަކައި ގެންގޮސްފައި ވަނީ ތަނަކުން ވެއްޓި ލިބުނު އަނިޔާއަކާ ގުޅިގެން ނޫންކަން ފުލުހުން ފާހަގަކޮށްފައިވެއެވެ.

ބުނީ ފުލުހުން ބެލި ބެލުމުން ހަށިގަނޑުގައި ފަރުވާދިނުމުގެ ތެރޭގައި ހުރި ނިޝާނެއް ވިޔަވައި ހަށިގަނޑަށް ގެއްލުމެއް ލިބިފައިހުރި ކަމުގެ ނިޝާނެއް ފެންނާން ނެތް ކަމަށެވެ.

އާއިލާގެ ފަރާތުން ވެސް މިހާތަނަށް ތުހުމަތުތަކެއްކޮށް އެ ފަދަ ޝަކުވާއެއް ފުލުހުންނާ ހިއްސާކޮށްފައިނުވާ ކަމަށް ވެސް ބުންޏެވެ.

އެ މީހާއަށް ފަރުވާ ދިނުމަށް މަސައްކަތް ކުރަމުން ދަނިކޮށް ކުއްލިއަކަށް ތެދުވެގެން ދުއްވައިގަނެގެން ދަނިކޮށް ހެއްޓުނުކަމުގެ މައުލޫމާތު ހޮސްޕިޓަލުން ދީފައިވާ ކަމަށް ވެސް ފުލުހުން ބުންޏެވެ.

މަރުވި އެ މީހާގެ ހަށިގަނޑުން ސާމްޕަލް ނަގާފައިވާއިރު، ފުލުހުން ބުނީ ސާމްޕަލް ނަގާފައި ވަނީ އެ ފަދަ މައްސަލައެއް ހުށަހެޅުމުން އާންމުކޮށް އަމަލު ކުރާ އުސޫލުން ކަމަށެވެ.

މި މައްސަލައާ ގުޅޭގޮތުން އިތުރަށް ބަލާންޖެހޭ ކަންކަން ފުލުހުން އަންނަނީ ބަލުމުންނެވެ.