ޖެނުއަރީ މަހު ވޭޕް ބޭނުންކޮށްގެން 12 މީހަކު ޖޫރިމަނާކޮށްފި

ވޭޕް ބޭނުންކޮށްގެން މި އަހަރުގެ ޖެނުއަރީ މަހު 12 މީހަކު ޖޫރިމަނާކޮށްފި އެވެ.

ފުލުހުން ބުނީ ޖެނުއަރީ މަހުގެ ނިޔަލަށް ވޭޕް ބޭނުންކުރުމުގެ 14 މައްސަލައެއްގައި 12 މީހަކު ޖޫރިމަނާކޮށްފައިވާ ކަމަށެވެ.

ދުންފަތް ކޮންޓްރޯލުކުރުމާބެހޭ ގާނޫނަށް އެއް ވަނަ އިސްލާހު ގެނައުމުގެ ބިލު ރައީސް ޑރ. މުޙައްމަދު މުއިއްޒު ތަސްދީގު ކުރެއްވުމާއެކު ރާއްޖޭގައި ވޭޕް ބޭނުން ކުރުން މަނާ ކުރީ މިދިޔަ އަހަރުގެ ޑިސެމްބަރު 15 ވަނަ ދުވަހުން ފަށައިގެންނެވެ.

ފުލުހުން މީޑިއާތަކަށް ހިއްސާކުރި ތަފާސްހިސާބުން މިދިޔަ ޖެނުއަރީ މަހު ވޭޕް ބޭނުން ކޮށްގެން 14 މައްސަލައެއްގައި 12 މީހަކު ޖޫރިމަނާ ކުރި އެވެ. އެއީ 70،000 ރުފިޔާއިންނެވެ.

މިދިޔަ އަހަރުގެ ޑިސެމްބަރު 15 އިން 22 އަށް ވޭޕް ބޭނުން ކޮށްގެން ހަ މައްސަލައެއްގައި ހަ ހަމީހަކު ޖޫރިމަނާ ކުރެވިފައިވެ އެވެ. އެއީ 30،000 ރުފިޔާއިންނެވެ.

އޭގެ އިތުރުން އެ އަހަރުގެ ޑިސެމްބަރު 15 އިން 31 ގެ ނިޔަލަށް ޖުމުލަ 14 މައްސަލައެއްގައި 11 މީހަކު ޖޫރިމަނާ ކުރި އެވެ. އެއީ 60،500 ރުފިޔާއިންނެވެ.

ރައީސް ތަސްދީގު ކުރެއްވި ބިލުގައިވާ ގޮތުން ވޭޕާއި ވޭޕު ކުރަން ބޭނުން ކުރާ ތަކެތި ރާއްޖެއަށް އެތެރެކޮށްފި ނަމަ އެ މީހަކު 50،000 ރުފިޔާއިން އިން ޖޫރިމަނާ ކުރާނެ އެވެ. އަދި، އެތެރެ ކުރާ ކޮންމެ ވޭޕަކަށް އިތުރު 10،000 ރުފިޔާގެ މަގުން ޖޫރިމަނާ އިތުރު ކުރެވޭނެ އެވެ.

މީގެއިތުރުން، މި އިސްލާހުގައިވާ ގޮތުން ރާއްޖޭގައި ވޭޕް ވިއްކާ ކޮންމެ ފަރާތެއް ޖޫރިމަނާ ކުރެވޭނީ 20،000 ރުފިޔާއިންނެވެ. އަދި ވިއްކި ކޮންމެ ވޭޕަކަށް 10،000 ރުފިޔާގެ ޖޫރިމަނާއެއް އަންނާނެ ކަމަށް ބިލުގައިވެ އެވެ. ހިލޭ ވޭޕެއް މީހަކަށް ދިނަސް 10،000 ރުފިޔާގެ ޖޫރިމަނާއެއް އަދި އެތަކެތި ބޭނުން ކުރާ ކޮންމެ މީހަކު 5،000 ރުފިޔާއިން ޖޫރިމަނާއެއް ދައްކަންޖެހޭނެ އެވެ.