ކުންފުނިތަކުގެ ވެރީންގެ މުސާރަތައް 90,000އަށްވުރެ ކުޑަ ކުރާން އަންގައިފި

ބޭންކުތައް ފިޔަވައި ސަރުކާރު ހިއްސާވާ ކުންފުނި ތަކުގެ ވެރީންގެ ތެރެއިން 90،000 ރުފިޔާއަށް ވުރެ އިތުރަށް މުސާރަ ލިބޭ މުވައްޒަފުންގެ މުސާރަތައް ކުޑަ ކުރާން ޕްރައިވެޓައިޒޭޝަން އެންޑް ކޯޕްރޮޓައިޒޭޝަން ބޯޑު (ޕީސީބީ)އިން މިއަދު އަންގައިފި އެވެ.

ސަރުކާރު ހިއްސާވާ ކުންފުނި ތަކުގެ މުސާރަ އާއި އިނާޔަތްތަކާ ގުޅޭގޮތުން ޕީސީބީން ނެރުނު ސާކިއުލާއެއްގައި ބުނީ، މި މަހުގެ އެއް ވަނަ ދުވަހުން ފަށައިގެން ކުރިއަށް އޮތް ދެ އަހަރު ދުވަހަށް ސަރުކާރު ކުންފުނި ތަކުގައި ތިބި ޓެކްނިކަލް މުވައްޒަފުން ފިޔަވައި، ކުންފުނީގެ އިސް މަގާމު ތަކުގައި ތިބޭ މުވައްޒަފުންނަށް އެންމެ ގިނަވެގެން ދެވޭނީ 90،000 ރުފިޔާ ކަމުގައި ރައީސް ޑރ. މުޙައްމަދު މުއިއްޒު ކަނޑައަޅުއްވާފައިވާ ކަމަށެވެ.

އެގޮތުން ބޭންކުތައް ފިޔަވައި ސަރުކާރު ހިއްސާވާ ކުންފުނި ތަކުގެ ބޯޑު ޑިރެކްޓަރުންގެ ތެރެއިން ރާއްޖެއިން ބޭރުގެ ޑިރެކްޓަރުން ފިޔަވައި ބޯޑު ތަކުގެ ޗެއާމަނުން، މެނޭޖިން ޑިރެކްޓަރުން އަދި ޑެޕިއުޓީ މެނޭޖިން ޑިރެކްޓަރުން ހިމެނޭހެން މަހު މުސާރަ އާއި އިނާޔަތް ތަކުން 90،000 ރުފިޔާ އަށްވުރެ އިތުރަށް ލިބޭ ޑިރެކްޓަރުންގެ މުސާރަ އާއި އިނާޔަތް ތަކުން 90،000 ރުފިޔާ އަށްވުރެ، އިތުރުވާ ބައި ޑިޑަކްޝަންގެ ގޮތުގައި އުނި ކުރުމަށް ޕީސީބީން ވަނީ އަންގައިފަ އެވެ.

މި ކަންކަމުގެ އިތުރުން ޓެކްނިކަލް މުވައްޒަފުން ފިޔަވައި އެހެން މުވައްޒަފުންގެ މުސާރަތައް ވެސް 90،000 އަށްވުރެ އިތުރުވާ ނަަމަ އެ އިތުރުވާ ބައި ކެނޑުމަށް ޕީސީބީން ވަނީ އަންގާފަ އެވެ.

ޕީސީބީން ބުނި ގޮތުގައި މިއީ ސަރުކާރުގެ އިގުތިސާދީ، އިސްލާހީ އެޖެންޑާގެ ދަށުން ދައުލަތުގެ ހަރަދު ކުޑަ ކުރުމުގެ ގޮތުން އެޅިން ފިވަޔަޅެކެވެ.