ސްޓެލްކޯގެ ޓްރާންސްފޯމަރަކުން ވައްކަން ކުރަން އުޅުނު މީހަކު އަތުލައިފި

ސްޓެލްކޯގެ ޓްރާންސްފޯމަރަކުން ވައްކަންކުރަން އުޅުނު މީހަކު އަތުލައިގެންފި އެވެ.

ރޭ ދަންވަރު 2:50 ގައި މާފަންނު މަދުރަސާ ސަރަހައްދުގައި ހުރި ޓްރާންސްފޯމަރު ސަބްސްޓޭޝަނަށްވަދެ، ވައްކަމުގެ އަމަލެއް ހިންގަން އުޅުނު މީހަކު ސީސީޓީވީ ކެމެރާއިން ފެނި، ފުލުހުންނަށް އެންގުމާ ގުޅިގެން އެ މީހާ ހައްޔަރުކުރެވިފައި ކަމަށް ސްޓެލްކޯއިން ކުރި އެކްސް ޕޯސްޓެއްގައި ބުންޏެވެ.

މާލޭގެ ސަބްސްޓޭޝަންތަކަކީ 24 ގަޑިއިރު ކެމެރާއިން މޮނިޓާ ކުރެވޭ ތަންތަން ނަމަވެސް، ހުޅުމާލޭގެ ދެވަނަ ދިޔަވަހީގެ  ސަބްސްޓޭޝަން ފަދަ ތަންތަނުން ކުރެވޭ މިފަދަ ވައްކަންތައް ހުއްޓުވުމަށް އާންމު ރައްޔިތުންގެ އެހީތެރިކަން ބޭނުންވާ ކަން ސްޓެލްކޯއިން ބުނެ އެވެ.

މިފަދަ އަމަލުތައް ހިންގައި ފަރާތްތަކުން، އެ ކަމަކީ އެމީހުންގެ ފުރާނައަށް ނުރައްކާވެ ދާނެ ކަމެއްކަން ދެނެގަނެ، އެފަދަ އަމަލު ތަކުން ދުރުހެލިވުމަށް އިލްތިމާސް ކޮށްފައިވެ އެވެ.

ރައްޔިތުންނަށް ދަތިތަކެއް ކުރިމަތިވާ މިފަދަ ވައްކަންތަކުން ހޯދައި ތަކެތި ވިއްކާ އަދި ގަންނަ ފަރާތްތައް ވެސް ހޯދައި، ގާނޫނީ ފިޔަވަޅު އެޅުމަށް ކަމާބެހޭ އިދާރާތަކަށް ސްޓެލްކޯއިން ވަނީއިލްތިމާސް ދަންނަވާފަ އެވެ.

ސްޓެލްކޯގެ ޓްރާންސްފޯމާ ސަބްސްޓެންޝަންތަކުން ވައްކަން ކުރުމަކީ ދޭތެރެދޭތެރެއިން ކުރާ ކަމެކެވެ. މިއީ މިފަދަ ތިން ވަނަ މައްސަލަ އެވެ.

އެގޮތުން މިދިޔަ އަހަރުގެ މާޗު މަހުގެ ތެރޭގައި ހިޔާ ސަރަހައްދުގައި ހުރި ޓްރާންފޯމަރެއްގެ ތެރެއަށްވަދެ ވައްކަން ކުރަން އުޅުނު މީހަކު ވަނީ މަރުވެފަ އެވެ.

މީގެ އިތުރުން މިމަހުގެ 15 ވަނަ ދުވަހު ހުޅުމާލެ ދެވަނަ ފޭހުގައި ހުރި ޓްރާންސްފޯމަރަކަށް ގެއްލުންދީ ވައްކަން ކުރަން އުޅުނު މީހަކު ހިފެހެއްޓުމުން ސްޓެލްކޯ މުވައްޒަފަކަށް ވަނީ ރެންޗަކުން ހަމަލާދީ މާރާމާރީ ވެސް ހިންގާފައެވެ.