ވައުދުތައް ފުއްދުމުގައި ސަރުކާރު ސީރިއަސްކަމާއެކު ދެމި އެބައޮތް: ރައީސް

ރިޔާސީ އިންތިހާބުގައި ވެވަޑައިގެންނެވި ވައުދުތައް ވަރަށް ރަނގަޅަށް ހަނދުމަފުޅު އެބަހުރި ކަމަށާއި، އެ ވައުދުތައް ފުއްދުމުގައި ސަރުކާރުން ސީރިއަސްކަމާއެކު ދެމިއޮތް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

ހއ. މާރަންދޫގެ ރައްޔިތުންނާ ބައްދަލުކުރައްވައި އެއީ ކުޅިވަރުގެ ދާއިރާ ކަމުގައިވިޔަސް، ބަނދަރާއި ރަށްގިރުމުގެ މައްސަލަކަމުގައި ވީ ނަމަވެސް، އުމްރާނީ ކަންކަން ކަމުގައިވިޔަސް، ކުނި މެނޭޖު ކުރުމާއި، އިޖުތިމާއީ، ސިއްހީ އަދި ތައުލީ ދާއިރާއިން ރަށަށް ބޭނުންވާ ކަންކަމުގައި ހަގީގީ ކުލަ ޖައްސަވައިދެއްވައި، ހައްލު ހޯއްދަވައިދެއްވާނެ ކަމުގެ ޔަގީންކަން، ރައީސް ވަނީ ދެއްވާފަ އެވެ.

މި އަހަރު، މި ކަންކަމަށް އަމަލީ ސިފަ ގެނެސްދިނުމަކީ ސަރުކާރުގެ ޕްލޭންކަން ފާހަގަ ކުރައްވައި ރައީސް ވިދާޅުވީ، އެކި ސަބަބުތަކާ ހެދި މިދިޔަ އަހަރު ކުރިއަށް ނުގެންދެވި ހުރި މަސައްކަތްތައް ވެސް ބާރު ދުވެލީގައި ކުރިއަށް ގެންގޮސްދެއްވާނެ ކަމަށެވެ.

ރަށުގެ ތަރައްގީއަށް ގިނަ މަޝްރޫއުތަކެއް ފަށައި، ހުއްޓިފައި ހުރިކަން ފާހަގަކުރައްވަމުން ރައީސް ވިދާޅުވީ، އެ ކަންކަން ވެސް ކުރިއަށް ގެންދެވޭނެ މަގުތައް އަދުގެ ސަރުކާރުން ހޯދާފައިވާ ކަމަށާ، އެކަންކަން ވެސް ކުރިއަށް ގެންދަވާނެ ކަމުގަ އެވެ.

އެގޮތުން ރަށުގެ ބަނދަރުގެ މައްސަލައަށް ފުރިހަމަ ހައްލެއް ހޯއްދަވައިދެއްވާނެ ކަމުގެ ޔަގީންކަން، ރައީސް ވަނީ މާރަންދޫގެ ރައްޔިތުންނަށް ދެއްވާފަ އެވެ.

މީގެ އިތުރުން ރަށުގެ ގިރާ ސަރަހައްދުގެ މައްސަލަ އާއި، ސުކޫލަށް ދިމާވެފައިވާ ޖާގައިގެ ދަތިކަމުގެ މައްސަލައާއި، ސިއްހީ މަރުކަޒުގެ ހިދުމަތް އެކަށީގެންވާ ގޮތެއްގައި ފޯރުކޮށްދިނުމުގައި ހުރި މައްސަލަތަކަށް ހައްލު ހޯއްދަވައިދެއްވައި، ކުރިއަށް އޮތް ދުވަސް ތަކުގައި މާ ލަސްތަކެއް ނުވެ، މަސައްކަތްތައް އަލުން ފައްޓަވައިދެއްވާނެ ކަމުގައި ރައީސް ވަނީ ވިދާޅުވެފަ އެވެ.