އިހަވަންދޫ ފިޝަރީޒް ކޮމްޕްލެކްސް ހުޅުވުމާ އެކު 150 ވަޒީފާ އުފެދޭނެ: ރައީސް

ރައީސް އިހަވަންދޫގައި ވާހަކަފުޅު ދައްކަވަނީ -- ފޮޓޯ/ ރައީސް އޮފީސް

ހއ. އިހަވަންދޫގައި އިމާރާތްކުރާ ފިޝަރީޒް ކޮމްޕްލެކްސް ތަރައްގީކޮށް ނިމި އެތަން ހިނގައިގަތުމުން އިހަވަންދޫގައި 150 ވަޒީފާ އުފެދި، މަސްވެރިކަމުގެ ސިނާއަތް އިތުރަށް ތަރައްގީ ވެގެން ދާނޭ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އިހަވަންދޫ ރައްޔިތުންނާ ބައްދަލުކުރެއްވުމަށް އެރަށުގައި މިއަދު ބޭއްވެވި ޖަލްސާގައި ވާހަކަފުޅު ދައްކަވަމުން ރައީސް ވަނީ އިހަވަންދޫ އަކީ މަސްވެރި ކަމުގެ ރަށެއްކަ މަށާއި، ބިންގާ އެޅިގެންދިޔަ ފިޝަރީޒް ކޮމްޕްލެކްސްގެ މަޝްރޫއަކީ ސިނާއަތުގެ ކުރިމަގަށް މުހިންމު މަސައްކަތެއ ްކަން ފާހަގަ ކުރައްވާފަ އެވެ.

އަދި، މި އަހަރުގެ މޭމަހު އަމަލީ މަސައްކަތްފެށި، 18 މަސް ދުވަހުގެ ތެރޭގައި މުޅި މަޝްރޫއު ނިންމޭނެ ކަމުގެ ޔަގީންކަން އެމަނިކުފާނު ވަނީ ދެއްވާފަ އެވެ.

މިމަޝްރޫއުގެ ދަށުން، 1000 ޓަނުގެ ކޯލްޑްސްޓޯރޭޖް ކެޕޭސިޓީ، އަދި 50 ޓަނުގެ ބްރައިން ފްރީޒިން ކެޕޭސިޓީ ގާއިމް ކުރެވިގެން ދާނޭ ކަމަށް އެ މަނިކުފާނު ވިދާޅުވިއެވެ. އަދި، މަސްކިރުން ފަސޭހަ ކުރުމަށް ޓަކައި ތިން ޕޮއިންޓަކުން މަސްކިރޭ ގޮތަށް ޖެޓީ އަކާއި ބަނދަރެއް ވެސް މި ކޮމްޕްލެކްސްގައި ގާއިމް ކުރެވިގެންދާނޭ ކަމަށްވެސް ރައީސް ވިދާޅުވި އެވެ.

ޖުމުލަ، 474 މިލިއަން ރުފިޔާ ހަރަދުވާ މިމަޝްރޫއަކީ ދިވެހިންގެ ފުދުންތެރި ކަމަށާއި ތަރައްގީއަށް ކުރިއަށް ގެންދެވޭ މުހިންމު މަޝްރޫއެއް ކަމުގައި ރައީސް ވިދާޅުވި އެވެ.

ރައީސް ޑރ މުޙައްމަދު މުޢިއްޒު އިހަވަންދޫ