ހުރިހާ ރައްޔިތުން އަޅުގަނޑުގެ ކުރިމަތީގައި ހަމަހަމަ ވާނެ: ރައީސް

ރައީސް މުއިއްޒު ހއ. ދިއްދޫގައި ވާހަކަފުޅު ދައްކަވަނީ --

ސިޔާސީ ފިކުރު މުހިންމެއް ނޫން ކަމަށާއި، ހުރިހާ ރައްޔިތުންނަކީ އެ މަނިކުފާނުގެ ކުރިމަތީގައި ހަމަހަމަ ރައްޔިތެއް ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރައީސް ހއ. ދިއްދޫއަށް ވަޑައިގެން، އެ ރަށުގެ ރައްޔިތުންނާ ބައްދަލު ކުރައްވައި، ދެއްކެވި ވާހަކަފުޅުގައި ވިދާޅުވީ ތަރައްގީ އަކީ އެންމެންނަށް ހަމަހަމަކޮށް ގެނެސްދެވޭ އެއްޗެއް ކަމަށާ، އެ މަނިކުފާނުގެ ކުރިފުޅުމަތީގައި އެންމެންނަކީ ވެސް ހަމަހަމަ ބައެއް ކަމަށެވެ. އަދި ސިޔާސީ ފިކުރު މުހިއްމު ނޫން ކަމަށް ވެސް ވިދާޅުވި އެވެ.

ގައުމަށް، އަދި ރަށަކަށް ގެނެވޭ ތަރައްގީއަކީ ސިޔާސީ ކަމެއް ނޫން ކަމުގައި ވިދާޅުވެ ވާހަކަފުޅުދައްކަވަމުން ރައީސް ވިދާޅުވީ އެއީ މުސްތަގުބަލަށް ޓަކައި ކުރެވޭ ސީރިއަސް މަސައްކަތެއް ކަމަށެވެ.

ފާހަގަކޮށްލެވޭ ގޮތުގައި ރިޔާސީ އިންތިހާބުގައި ލިބިވަޑައިގެންނެވި ކާމިޔާބީއާ އެކު، ރައީސް މުއިއްޒު ނޫސްވެރިންނާއެކު ބޭއްވި ފުރަތަމަ ބައްދަލު ކުރެއްވުމުގައި ވެސް ވަނީ ހިޔާލު ތަފާތުވުންތައް ހުއްޓަސް، ކޮންމެ ދިވެހި ރައްޔިތަކީ އެ މަނިކުފާނުގެ ކުރިމަތީގައި ހަމަހަމަ ރައްޔިތެއް ކަމުގެ ޔަގީން ކަން ދެއްވާފަ އެވެ.

ރައީސް ހއ ގެ 10 ރަށަކަށް މި ކުރައްވައި ތިން ދުވަހުގެ ދަތުރުފުޅުގައި ރަށްރަށުގައި އަލަށް އިމާރާތް ކުރަން ނިންމާފައިވާ ފުލުހުންގެ މަރުކަޒު ތަކާއި ކައުންސިލް އިމާރާތް، އަދި ކޯލްޑް ސްޓޯރޭޖް ފެސިލިޓީ މަޝްރޫއުގެ މަސައްކަތްތައް ފައްޓަވައިދެއްވާނެ އެވެ. މީގެ އިތުރުން އައިޑީކާޑާއި ޕާސްޕޯޓް ދޫކުރުމުގެ ހިދުމަތް ފައްޓަވައިދެއްވާނެ އެވެ.

ރައީސް ޑރ މުޢިއްޒު