ފިއްލަދޫގެ ތަރައްގީން ދިވެހި ގިނަ ރައްޔިތުންނަށް ފައިދާ ތަކެއް ކުރާނެ: ރައީސް

ރައީސް ޑރ. މުއިއްޒު ހއ. ފިއްލަދޫގައި ވާހަކަފުޅުދައްކަވަނީ --

ހއ. ފިއްލަދޫއަށް ގެންނަ ތަރައްގީގެ ސަބަބުން ދިވެހި ގިނަ ރައްޔިތުންނަށް ފައިދާތަކެއް ކުރާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ފިއްލަދޫ ރައްޔިތުންނާ ބައްދަލު ކުރެއްވުމަށް، ފިއްލަދޫ ފިޓްނަސް އެންޑް ރެކްރިއޭޝަން ސެންޓަރުގައި މިއަދު ބޭއްވި ޖަލްސާގައި ދެއްކެވި ވާހަކަފުޅުގައި ރައީސް ވަނީ ފިއްލަދޫ އަކީ ބިން ބޮޑު އަދި ސަރަހައްދީ ގޮތުން ވެސް ގިނަ ބަޔަކަށް ފައިދާ ތަކެއް ލިބޭނެ ފަދަ ސަރަހައްދެއްގައި އޮތް ރަށެއްކަން ފާހަގަ ކުރައްވާ އެ ރަށަކީ ތަރައްގީގެ ފުރުސަތު ވަރަށް ބޮޑު ރަށެއްކަމުގައި ވިދާޅުވެފަ އެވެ.

މިއަދުގެ ޖަލްދސާގައި ރައީސް ވަނީ ފިއްލަދޫގެ ތަރައްގީއިން ދިވެހި ގިނަ ރައްޔިތުންނަށް ފައިދާތަކެއް ކުރާނެކަން ފާހަގަ ކުރައްވާފަ އެވެ.

މިގޮތުން މި ސަރަހައްދުގެ އިންޓަނޭޝަނަލް އެއާޕޯޓު ދެމެހެއްޓެނިވި ގޮތެއްގައި ހިންގުމަށާއި، ފަތުރުވެރި ކަމުގެ ދާއިރާ ސިންދަފާތު ކުރުމަށް ވެސް މުހިންމު ރަށެއްގެ ގޮތުގައި އެމަނިކުފާނު ފިއްލަދޫ ފާހަގަ ކުރެއްވި އެވެ.

ރައީސްގެ ވާހަކަފުޅުގައި ފިއްލަދޫގެ ތަރައްގީއަށް އެންމެ އިސްކަމެއް ދެއްވައިގެން ކުރައްވާނެ ކަމަކީ އެ ރަށުގެ މަގުތައް ޒަމާނީ ފެންވަރަށް ތަރައްގީ ކުރުން ކަމުގައި ވިދާޅުވި އެވެ.

އަދި ފިއްލަދޫއަށް ބޭނުންވާ ތަރައްގީގެ ކަންކަމުގެ ތެރޭގައި ހިމެނޭ ސިއްހީ ދާއިރާ، ތައުލީމީ ދާއިރާ އަދި ކުޅިވަރުގެ ދާއިރާ ވެސް ވަކި ތަރުތީބަކުން ކުރިއަށް ގެންދަވާނެ ކަމުގައި އެ މަނިކުފާނު ވިދާޅުވި އެވެ.

ރައީސް ޑރ މުޙައްމަދު މުޢިއްޒު