ދެން ފެނިގެންދާނީ ނުހިނގާހުރި ކަންކަމާ ކުރަން ވައުދުވި ކަންކަން ހިނގައިގަންނަ މަންޒަރު

މި ދައުރުގައި ދެން ފެނިގެންދާނީ ބަޖެޓުގައި ހުރި ފުރުސަތު ތަކުގެ ތެރެއިން ހުއްޓިފައި ހުރި ކަންކަމާއި ސަރުކާރުން އަލަށް ކުރުމަށް ވައުދުވެފައިވާ ކަންކަން ހިނގައި ގަންނަ މަންޒަރު ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، ހއ. މުރައިދޫ ރައްޔިތުންނާ ބައްދަލުކުރެއްވުމަށް އެ ރަށު ސުކޫލުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ ވަރަށް ސާފުކޮށް ސަރުކާރުން ކުރާނެ ކަންކަން ތަރުތީބު ކުރެވިގެން ދާނެ ގޮތް އަބަދު ވެސް ހާމަ ކުރައްވަމުން ގެންދަވާ ކަމަށެވެ. އަދި ސަރުކާރުގެ ދުރުރާސްތާ ޕްލޭނާއި މެދު ރާސްތާގެ ޕްލޭންގެ އިތުރުން ކަންކަން ކުރުމުގައި އިސްކަންދޭ  ތަރުތީބުވެސް އިއުލާން  ކުރައްވަމުންދާކަމުގައި އެ މަނިކުފާނު ވިދާޅުވި އެވެ.

"އަޅުގަނޑު އަބަދުވެސް މަސައްކަތް ކުރާ ގޮތަކީ ރައްޔިތުންގެ ގާތުން ކަންކަން އޮޅުން ފިލުވައިގެން، އެންމެ އިސްކަން ދޭންޖެހޭ ކަންކަމަށް އިސްކަން ދީގެން، ރައްޔިތުންނަށް އެ ދަތިވާ ކަން ކަމަށް ހައްލުތައް ގެނެސްދިނުމަށް" ރައީސް ވިދާޅުވި އެވެ.

މީގެ އިތުރުން އެމަނިކުފާނު ވިދާޅުވީ ސަރުކާރުގެ ކަމާބެހޭ މިނިސްޓްރީތަކާ މަޝްވަރާ ކޮށްގެން، ރަށްރަށުގައި ނުފެށި ހުރި، އަދި ހުއްޓިފައިހުރި މަޝްރޫއުތައް ހިންގޭނެ މަގު ތަނަވަސް ކުރުމުގެ މަސައްކަތް މިހާރު ވެސް ކުރައްވަމުން އަންނަ ކަމަށެވެ.

އަދި އެކަންކަން ކާމިޔާބު ކުރެވޭނެ ކަން ފާހަގަ ކުރައްވައި، ދެން ފެނިގެން ދާނީ ބަޖެޓުގައި ހުރި ފުރުސަތު ތަކުގެ ތެރެއިން ހުއްޓިފައި ހުރި، ނުހިނގާހުރި ކަންކަމާއި، އަދި ސަރުކާރުން އަލަށް ކުރުމަށް ވައުދުވެފައިވާ ކަންކަން ހިނގައިގަންނަ މަންޒަރު ކަމުގައި އެ މަނިކުފާނު ވިދާޅުވި އެވެ.