ރާއްޖޭގައި ދާއިމީ ގޮތެއްގައި ބޭރުގެ އަސްކަރީ ސިފައިން ތިބެން ބޭނުމެއް ނުވާނެ ކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ސިންގަޕޫރުގެ އިންޓަނޭޝަނަލް އިންސްޓިއުޓް ފޯ ސްޓްރެޓެޖިކް ސްޓަޑީސްގެ ފަރާތުން ބޭއްވި "ޝަންގްރިލާ ޑައިލޮގް 2024"ގައި ވާހަކަފުޅު ދައްކަވަމުން ވަޒީރު ވިދާޅުވީ ރައީސް ޑރ. މުޙައްމަދު މުޢިއްޒުގެ ސިޔާސަތުގައި ދިފާޢީ ޤާބިލުކަން އިތުރުކޮށް ރާއްޖޭގެ ވަށައިގެންވާ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމުގައި އިސްކަންދެއްވާ ކަމަށެވެ. އަދި ދިފާޢީ ގުޅުންތައް ވަރުގަދަކުރިނަމަވެސް އެއްވެސް މާނައެއްގައި ދިވެހި ބިމުގައި ބޭރުގެ ސިފައިން ޤާއިމްވެ ތިބުމަށް ދިވެހި ސަރުކާރުން ބޭނުން ނުވާ ކަމަށެވެ.

"އަޅުގަނޑުމެންގެ ބިމުގައި ދާއިމީ ގޮތެއްގައި ބޭރުގެ އަސްކަރީ ޙާޒިރީއެއް ބޭނުމެއްނުވޭ އަދި ނުވެސްވާނެ. އަޅުގަނޑުމެންގެ އުންމީދަކީ، ރައްޔިތުންގެ މި ޑިމޮކްރެޓިކް ނިންމުމަށް އަޅުގަނޑުމެންގެ އެކުވެރި ޤައުމުތަކުން އިޙްތިރާމް ކުރެއްވުން،". ވަޒީރު ވިދާޅުވިއެވެ.

ރާއްޖެ ފަދަ ކުދި ގައުމުތަކުގެ މިނިވަންކަމާއި ސަލާމަތީ ކަންކަން ކަށަވަރުކޮށްދެއްނީ ބައިނައްލަގުވާމީ ގާނޫނުތަކުން ކަމަށާއި އެހެން ނަމަވެސް ފަހަކަށް އައިސް ބައެއް ބޮޑެތި ގައުމުތަކުން އެ ގާނޫނުތަކާއި އުސޫލުތަކަށް އަމަލުނުކުރާ ކަަމަށް ވެސް އޭނާ ވިދާޅުވިއެވެ. އޭގެ ސަބަބުން ކުދި ގައުމުތަށް ދިފާއީ ގޮތުން ބަލިކަށިވެ، އަމިއްލަ މިނިވަންކަން ކަށަވަރު ކުރުމަށް ބޮޑެތި ގައުމުތަކާއިއެކު ދިފާއީ ގުޅުން އުފައްދަންޖެހޭ ކަން އޭނާ ފާހަގަކުރެއްވިއެވެ.

ރާއްޖެއަކީ އަބަދުވެސް ބައިނައްލަގުވާމީ ގާނޫނުތަކަށް އަމަލުކުރާނެ ގައުމެއްކަމުގެ ޔަގީންކަންދެއްވަމުން ވޒީރު ވިދާޅުވީ، ރާއްޖޭގެ އަމިއްލަ ދިފާއީ ނިޒާމު ވަރުގަދަކުރުމަށްޓަކައި އެހެން ގައުމުތަކާއި ގުޅުން ބަދެހިކުރަންޖެހޭ ކަމަށެވެ. އަދި އެއީ ރައީސް ޑރ. މުއިއްޒުގެ އަމާޒު ކަމަށް ވެސް ވިދާޅުވިއެވެ.

ރާއްޖޭގެ ސުލްހައާއި، ހަމަޖެހުމާއި، ސަލާމަތާއި، ރައްކާތެރިކަން ޤާއިމްކުރުމަށް ރައިސް ޑރ. މުޢިއްޒުގެ ސަރުކާރުގެ ސިޔާސަތުތަކުގައި އެންމެ އިސްކަންދެއްވަނީ، ރާއްޖޭގެ އަމިއްލަ ދިފާއީ ބާރުތަކުގެ ކެޕޭސިޓީ އިތުރުކުރުމަށާއި ދުނިޔެ ޤަބޫލުކުރާ މިންގަނޑުތައް ރާއްޖޭގެ ސަރަހައްދުގައި ކަށަވަރު ކުރުން ކަމަށްވެސް ވިދާޅުވިއެވެ. އެގޮތުން މިހާރުގެ ގުޅުންތައް ދެމެހެއްޓައި، އިތުރު ގުޅުތައް ޤާއިމްކުރެއްވުމަށްވެސް ރައީސް އިސްކަންދެއްވާކަމަށް ވަޒީރު ވިދާޅުވިއެވެ