ތިން ކައުންސިލަކަށް ރަސްމީކޮށް ފަޅުރަށް ހަވާލު ކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިއުލާން ކުރެއްވި ކައުންސިލް ތަކަށް ފަޅު ރަށްތައް ދޫކުރުމުގެ ސިޔާސަތުގެ ދަށުން އިތުރު ތިން ކައުންސިލަކަށް ހަތަރު ފަޅުރަށް ހަވާލު ކޮށްފި އެވެ.

މި ރަށްރަށް ކައުންސިލްތަކާ ހަވާލު ކުރުމުުގެ އެއްބަސްވުން ތަކުގައި ސޮއި ކުރުމުގެ ރަސްމިއްޔާތު މިއަދު ބޭއްވީ ފިނޭންސް މިނިސްޓްރީގަ އެވެ.

އެއްބަސްވުމުގައި ކައުންސިލު ތަކުގެ ފަރާތުން ސޮއި ކުރެއްވީ އެ ކައުންސިލު ތަކުގެ ރައީސުންނެވެ. އަދި ފިނޭންސް އެންޑް ޕްލޭނިން މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރު އަހުމަދު މާޒިން އެވެ.

މިއީ ލ. ބޮޑުމާބުޅަލި ލ. މާވަށު ކައުންސިލާ ހަވާލު ކުރުމާއި ދ. މިނިމަސްގަލި އަދި ދ. ފެންފުށި ދ. އަތޮޅު ކައުންސިލާ ހަވާލު ކުރުމުގެ އިތުރުން ރ. ނެޔޮ. ރ. އިނގުރައިދޫ ކައުންސިލާ ހަވާލު ކުރުމުގެ އެއްބަސްވުމެވެ.

ރަސްމީކޮށް ފަޅު ރަށްރަށް ހަވާލުކުރި ކައުންސިލްތަކަކީ،

1. ދ. އަތޮޅު ކައުންސިލް: ދ. މިނިމަސްގަލި އަދި ދ. ފެންފުށި

2. ރ. އިނގުރައިދޫ ކައުންސިލް: ރ. ނެޔޮ

3. ލ. މާވަށު ކައުންސިލް: ލ. ބޮޑުމާބުޅަލި

ރައީސް ޑރ. މުއިއްޒު އިއުލާން ކުރެއްވި ކައުންސިލު ތަކަށް ފަޅު ރަށްތައް ދޫ ކުރުމުގެ ސިޔާސަތުގެ ދަށުން މިހާރު ވެސް 24 ފަޅު ރަށެއް ހޯދުމަށް ޕްރޮޕޯސަލް ހުށަހުޅުމުގެ ފުރުސަތު ވަނީ ހުޅުވާލާފަ އެވެ.

ލޯކަލް ގަވަނެންސް މިނިސްޓަރު އާދަމް ޝަރީފް މީގެ ކުރިން ވިދާޅުވެފައި ވަނީ ކޮންމެ ކައުންސިލަކަށް 25 އަހަރަށް ފަޅު ރަށެއް ދިނުމަށް ރައީސް ޑރ. މުއިއްޒު ނިންމެވުމަކީ ލާމަރުކަޒީ ނިޒާމު ހަރުދަނާ ކުރުމަށް ޓަކައި އެ މަނިކުފާނު ގެންގުޅުއްވައި ހާއްސަ ސިޔާސަތުގެ ދަށުން ނިންމަވާފައިވާ ނިންމުމެއް ކަމުގަ އެވެ.