ފުލުހުންގެ 38 ވަނަ އަސާސީ ތަމްރީނު ކޯސް ނިންމައި ބައިވެރީންނަށް އެވޯޑް ދީފި

ނޭޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓުގެ ޓްރެއިނިން ސެންޓަރު ދ. ވާނީގައި ކުރިއަށްގެންދިޔަ ފުލުހުންގެ 38 ވަނަ އަސާސީ ތަމްރީނު ކޯސް ނިންމުމުގެ ރަސްމިއްޔާތު ބާއްވައިފި އެވެ.

ވާނީގައި ރޭ ބޭއްވި އެ ރަސްމިއްޔާތު ޝަރަފުވެރި ކޮށްދެއްވީ ދިފާއީ ވަޒީރު މުހައްމަދު ގައްސާން މައުމޫން އެވެ.

މި ރަސްމިއްޔާތުގައި، ކޯހުން ވަނަވަނަ އަށް ހޮވުނު ދަރިވަރުންނަށް އެވޯޑް ހަވާލުކޮށްދެއްވީ ދިފާއީ ވަޒީރާއި ދާހިލީ ވަޒީރު އަދި ކޮމިޝަނަރު އޮފް ޕޮލިސް އެވެ.

މި ކޯހުން ހުރިހާ ގޮތަކުން އެންމެ މޮޅު ދަރިވަރަކަށް ހޮވުނީ ކޮންސްޓަބަލް ހަސަން އަލީފް އިބްރާހީމް އެވެ. ކޮމިޝަނާ އޮފް ޕޮލިސް އެކްސެލެންސް އެވޯޑު މި ދަރިވަރަށް ހަވާލުކޮށްދެއްވީ ކޮމިޝަނަރު އޮފް ޕޮލިސް އަލީ ޝުޖާއު އެވެ.

ކޯހުގެ އިންޑޯ މާއްދާތަކުން އެއްވަނަ ދަރިވަރަކަށް ކޮންސްޓަބަލް ޝިނާ މުޙައްމަދު ޖުނައިދު ހޮވިފައިވާއިރު، އައުޓްޑޯ މާއްދާތަކުން އެއްވަނަ ދަރިވަރަކަށް ހޮވުނީ ކޮންސްޓަބަލް ހަސަން އަލީފް އިބްރާހީމް އެވެ.

އެންމެ މޮޅު ސްކޮޑަކަށް ހޮވިފައި ވަނީ ބީފާނު ސްކޮޑެވެ. މި ސްކޮޑަށް ޝީލްޑް ހަވާލުކޮށްދެއްވީ ދިފާއީ ވަޒީރު އެވެ.

ފުލުހުންގެ އަސާސީ ތަމްރީނު ކޯހަކީ ރާއްޖޭގެ ގާނޫނު އަސާސީން ފުލުހުންނާ މަތިކޮށްފައިވާ ގާނޫނީ މަސްއޫލިއްޔަތު އަދާ ކުރުމަށާއި، ފުލުހެއްގެ މަސްއޫލިއްޔަތު އެންމެ އެދެވޭ ގޮތުގައި އަދާ ކުރުމަށް ބޭނުންވާ އަސާސީ ތަމްރީނާއި މުހިންމު ހުނަރާއި އިލްމު އަދި މައުލޫމާތު އުނގަންނައިދިނުމަށް ފަރުމާކޮށްގެން ކުރިއަށް ގެންދާ ކޯހެކެވެ.

މި ކޯހުގައި، ދީނީ ވާޖިބު ތަކާއި އިސްލާމީ ރިވެތި އަހުލާގާއި އިންސާނީ ހައްގުތައް އަދި ފުލުހުންގެ ކޯޑް އޮފް ކޮންޑަކްޓާއި ކޯޑް އޮފް އެތިކްސް ފަދަ ބައިތަކާއެކު ތަމްރީނުތައް ކުރިއަށް ގެންދިޔަ އެވެ.

މިދިޔަ އަހަރުގެ ސެޕްޓެންބަރު 14 އިން މި ޖަނަވަރީ މަހުގެ 14 އަށް ކުރިއަށް ގެންދިޔަ 38 ވަނަ އަސާސީ ތަމްރީނު ކޯހުގައި 140 ފުލުހުން ބައިވެރިވެ 127 ފުލުހުން ކާމިޔާބު ކަމާއެކު ކޯސް ފުރިހަމަކޮށް ފާސްވެފައިވެ އެވެ.

މީގެ ތެރޭގައި ހިމެނެނީ 37 އަންހެން ފުލުހުންނާއި 90 ފިރިހެން ފުލުހުންނެވެ.